FLASH
Shkruar nga Pamfleti
Administrata e presidentit amerikan Donald Trump po shqyrton me kujdes mundësinë e angazhimit të kryetarit të parlamentit iranian, Mohammad Bagher Ghalibaf, si një partner të mundshëm për negociata në fazën e ardhshme të krizës me Iranin.
Sipas një raportimi të Politico, të cituar nga media ndërkombëtare, dy zyrtarë të administratës amerikane kanë konfirmuar se Ghalibaf shihet nga disa qarqe në Shtëpinë e Bardhë si një figurë për dialog dhe potencialisht me rol më të gjerë në drejtimin e vendit në të ardhmen.
Një prej zyrtarëve ka deklaruar se ai konsiderohet “një kandidat premtues”, por ka theksuar se vlerësimi është ende në fazë paraprake dhe nuk është marrë asnjë vendim përfundimtar.
Këto zhvillime vijnë në një moment tensionesh të larta mes SHBA-së dhe Iranit, ku kontaktet mes palëve mbeten të paqarta dhe kryesisht indirekte. Presidenti Trump ka folur për “bisedime konstruktive”, ndërsa autoritetet iraniane kanë mohuar ekzistencën e negociatave të drejtpërdrejta.
Raportime të tjera sugjerojnë se Ghalibaf mund të jetë një nga figurat kyçe në komunikimet e ndërmjetësuara, megjithëse vetë ai i ka mohuar kontaktet direkte me Uashingtonin dhe ka paralajmëruar për reagime ndaj presionit amerikan.
Ghalibaf, 64 vjeç, është një figurë me profil të fortë në kampin konservator iranian dhe ka mbajtur qëndrime të ashpra ndaj SHBA-së dhe aleatëve të saj në të kaluarën. Megjithatë, disa zyrtarë amerikanë vlerësojnë se pozicioni i tij brenda strukturave të pushtetit mund ta bëjë atë një aktor të rëndësishëm për çdo proces të mundshëm negociues.
Diskutimet për figura të mundshme brenda sistemit iranian lidhen edhe me pasiguritë mbi strukturën aktuale të udhëheqjes në Teheran dhe përpjekjet e SHBA-së për të gjetur kanale efektive komunikimi në një situatë të ndërlikuar gjeopolitike.
Aktualisht, nuk ka konfirmim zyrtar për një rol të tillë të Ghalibaf, ndërsa zhvillimet mbeten në fazë dinamike dhe të paqartë.
Lini një Përgjigje