FLASH
Shkruar nga Pamfleti
Pas një pritjeje të gjatë, Shreku, Fiona dhe Donkey janë gati të rikthehen në ekranin e madh. Traileri i parë i shumëpritur i filmit “Shrek 5” është publikuar, duke u dhënë fansave një shije të aventurës së re që do të mbërrijë në kinema më 30 qershor 2027.
Në projektin e ri rikthehen zërat ikonë të Mike Myers (Shrek), Eddie Murphy (Donkey) dhe Cameron Diaz (Fiona). Kastit i bashkohen gjithashtu Zendaya, Marcelo Hernandez dhe Skyler Gizondo, të cilët interpretojnë fëmijët tashmë të rritur të Shrekut dhe Fionës – Felicia, Fergus dhe Farkle.
Çfarë tregon traileri?
Videoja hapet me Shrekun dhe Donkey-n teksa udhëtojnë drejt mbretërisë Far Far Away. Që në minutat e para bie në sy një stil i ri animacioni, për të cilin Donkey bën edhe një koment humoristik, duke thënë se “ka ardhur koha për një ndryshim”.
Gjatë udhëtimit, familja e Shrekut përballet me personazhe të rinj dhe situata komike. Ata ndeshen me një gjigant, policinë e mbretërisë dhe një burrë dëbore që kujton dukshëm Olaf-in nga “Frozen”. Në trailer shfaqet edhe rikthimi i Medenjakut, një prej personazheve më të dashur të sagës.
Momenti final i videos i gjen Shrekun, Fionën, fëmijët e tyre dhe Donkey-n në një qeli burgu, ndërsa ky i fundit këndon me entuziazëm “Baby Come Back” dhe “Roxanne”, përballë bezdisjes së dukshme të Shrekut.
Vazhdimi i parë pas 17 vitesh
“Shrek 5” shënon rikthimin e serisë kryesore pas plot 17 vitesh, që nga publikimi i “Shrek Forever After” në vitin 2010.
Gjatë kësaj periudhe, universi i Shrekut u zgjerua me dy filma të suksesshëm të personazhit Puss in Boots, përfshirë edhe “Puss in Boots: The Last Wish”, i cili u prit mjaft mirë nga publiku dhe kritika.
Fansat të ndarë për serinë e re
Publikimi i trailerit ka shkaktuar reagime të shumta në rrjetet sociale. Brenda pak orësh, videoja grumbulloi qindra mijëra shikime në YouTube, por jo të gjithë janë të bindur nga ndryshimet vizuale.
“Kanë pasur katër filma jashtëzakonisht të suksesshëm. Pse duhej ta ndryshonin stilin e animacionit?”, shkroi një përdorues në rrjetin X.
Një tjetër komentoi: “Kjo duket sikur është krijuar nga inteligjenca artificiale”.
Ndërsa një fans tjetër u shpreh: “Ka diçka që nuk më bind te animacioni. Nuk di ta përcaktoj saktësisht, por duket ndryshe nga sa prisja”.
Megjithatë, ka edhe nga ata që preferojnë të presin filmin e plotë përpara se të japin verdiktin përfundimtar. “Mund të mësohem me dizajnin e ri nëse historia është e mirë. Jam skeptik, por mbetem kurioz”, shkroi një ndjekës.
Mbetet për t’u parë nëse “Shrek 5” do të arrijë të rikrijojë magjinë e filmave që e shndërruan ogërin e gjelbër në një nga personazhet më të dashur të animacionit modern.
Lini një Përgjigje