FLASH
Shkruar nga Pamfleti
Një eurodeputet, ndër më të rëndësishmit në Parlamentin Europian, është vendosur nën hetim, pasi ka krahasuar rojen me një kafshë shtëpiake (qen).
Johan Van Overtveldt, kryetar i Komitetit të Buxhetit të Parlamentit dhe ministër i Financave i Belgjikës nga viti 2014 deri në vitin 2018, u përfshi në një konfrontim me një roje sigurie të Parlamentit Europian, ndërsa e krahasoi atë me një kafshë që mbante në shtëpi.
Incidenti ka ndodhur në 11 shkurt, ndërsa rasti është marrë në shqyrtim nga Presidentja e Parlamentit Europian, Roberta Metsola.
Van Overtveld i tha Politico se nuk kujtonte të kishte përdorur një gjuhë të tillë, por pranoi se e ngriti zërin ndaj rojes.
Sipas letrës nga USPE, e cila përfaqëson stafin e Parlamentit, një oficer sigurie në portën e ndërtesës në Bruksel ndaloi Van Overtveld kur ai u përpoq të hynte me gruan e tij, e cila zotëronte një leje-hyrje të skaduar.
“Në përgjigje të këmbënguljes së stafit të sigurisë që të ndiqeshin rregullat, ai kërkoi të shihte distinktivin e rojes përgjegjëse për ta identifikuar atë dhe më pas ia hodhi dokumentin me zemërim në dysheme”, thuhet në letrën drejtuar Metsola-s, të datës 16 shkurt.
"Pastaj, kur roja i kërkoi të tregonte respekt, duke theksuar se po i drejtohej një qenieje njerëzore, eurodeputeti u përgjigj me një reagim fyes, duke e krahasuar atë me një kafshë shtëpiake (qenin e tij), duke e poshtëruar publikisht", thuhet në njoftim.
Van Overtveld pohoi se nuk ka qen apo ndonjë kafshë tjetër shtëpiake dhe se është "pothuajse i sigurt se nuk ka përdorur fjalë të tilla".
Një zëdhënës i Parlamentit Europian tha se Dhoma e Përfaqësuesve “po shqyrton incidentin që përfshin një eurodeputet dhe po vlerëson faktet”.
Van Overtveld është anëtar i Aleancës së Re Flamane (N-VA), partisë së kryeministrit belg Bart De Ëever, e cila i përket grupit të Konservatorëve dhe Reformistëve Evropianë (ECR).
Në një email të veçantë drejtuar stafit të Parlamentit, USPE iu referua “keqtrajtimit të kohëve të fundit të njërit prej punonjësve tanë”, pa përmendur emrat e përfshirë.
“Ky incident nuk është një incident i izoluar, por është pjesë e një problemi më të gjerë sistemik që prek personelin e sigurisë”, thuhej në mesazh. “Oficerët e sigurisë përballen me mungesë të mundësive për zhvillim karriere dhe njohje të pamjaftueshme të përvojës së tyre profesionale.”
Lini një Përgjigje