FLASH
Shkruar nga Pamfleti
Zyrat e Agjencisë së OKB-së për refugjatët palestinezë u dëmtuan rëndë gjatë një sulmi izraelit në kampin e refugjatëve në Bregun Perëndimor.
Agjencia zyrtare palestineze e lajmeve raporton se buldozerët izraelitë shkatërruan pjesërisht godinën e UNRWA-së.
Por shteti hebre mohoi të kishte goditur selinë e agjencisë në kampin Nur Shams. Ai deklaroi se militantët kishin vendosur eksploziv në afërsi të ndërtesës dhe e shpërthyen për të eliminuar trupat izraelite, duke dëmtuar godinën.
Incidenti erdhi pasi Parlamenti izraelit miratoi këtë javë ligjin që i ndalon agjencisë së OKB-së të veprojë në Izrael dhe në territoret palestineze.
Shteti hebre akuzon UNRWA-në se mbyll sytë përpara pranisë së militantëve në radhët e saj, gjë që përgënjeshtrohet nga agjencia. Ligji i miratuar hyn në fuqi pas tre muajsh.
“Ne po e themi këtë shumë qartë, UNRWA është pjesë e problemit. Anëtarët e saj morën pjesë në masakër. Dhe tani është koha që komuniteti ndërkombëtar, duke filluar nga Kombet e Bashkuara, të rishikojë dhe të bëjë atë që duhet për t’u ardhur në ndihmë palestinezëve në vend që t’u përmbahet ideve të hershme mbi agjencinë, tek e cila janë infiltruar në masë militantët që po e keqpërdorin për qëllimet e tyre”, tha David Mencer, zëdhënës i qeverisë izraelite.
Agjenci të shumta të OKB-së kanë dalë në mbështetje të UNRWA-së, duke e cilësuar si “shtyllën kurrizore” të organizatës për aktivitetet në Gaza.
UNRWA ofron arsim, kujdes shëndetësor dhe ndihma për miliona refugjatë palestinezë, që datojnë që nga lufta e vitit 1948 dhe krijimi i Izraelit. Familjet e refugjatëve përbëjnë gjithashtu pjesën dërrmuese të popullsisë në Gaza.
Lini një Përgjigje