FLASH
Shkruar nga Pamfleti
Ushtria izraelite njoftoi se ka kryer një valë të re sulmesh ajrore në kryeqytetin iranian, Teheran, duke shënjestruar objekte që sipas saj lidhen me aktivitetet ushtarake të Gardës Revolucionare Islamike (IRGC).
Sipas një deklarate, një nga objektivat kryesore ishte selia e forcës hapësinore të IRGC-së. Ushtria izraelite tha se ky objekt shërbente si qendër për pritjen, transmetimin dhe kërkimin e të dhënave të lidhura me Agjencinë Hapësinore Iraniane, të cilën Izraeli e konsideron të lidhur me strukturat ushtarake të regjimit iranian.
“IDF-ja shënjestroi dhe çmontoi selinë e Forcës Hapësinore të IRGC-së të regjimit terrorist iranian. Selia shërbeu si një qendër pritjeje, transmetimi dhe kërkimi për Agjencinë Hapësinore Iraniane, e cila është e lidhur me ushtrinë e regjimit”, thanë Forcat e Mbrojtjes së Izraelit (IDF).
IDF theksoi se objekti përdorej për aktivitete kërkimore dhe për monitorimin e sistemeve satelitore.
Në të njëjtën kohë, ushtria izraelite bëri të ditur se gjatë operacionit janë goditur edhe dhjetëra objektiva të tjerë në zona të ndryshme. Në deklaratë thuhet se, rreth 50 bunkerë që shërbenin për ruajtjen e municioneve janë shkatërruar, ndërsa janë sulmuar edhe një kompleks i Gardës Revolucionare si dhe një qendër e sigurisë së brendshme.
Sulmet e fundit vijnë në mes të përshkallëzimit të tensioneve mes Izraelit dhe Iranit, ndërsa të dyja palët kanë intensifikuar operacionet ushtarake në rajon.
Lini një Përgjigje