FLASH
Shkruar nga Pamfleti
Një 37-vjeçar, i cili vuan dënimin në burgun Burg, pranë qytetit të Magdeburgut të Gjermanisë, dyshohet se ka vrarë gruan e tij që shkoi për ta takuar në burg. Sipas asaj që raportojnë gazetat gjermane, gruaja është gjetur e pajetë pas një bisede me bashkëshortin e saj, e cila ka ndodhur pasditen e djeshme, të enjten 3 prill.
Prokuroria ruan konfidencialitetin maksimal për këtë çështje, por sipas informacionit të dhënë nga një pjesëtar i grupit hetimor për Bild, trupi i 35-vjeçares u gjet pas orës 14:00 në një nga dhomat e përdorura për takime afatgjata me të burgosurit, zakonisht për takime martesore apo për të kaluar kohë me fëmijët e vegjël. Këto janë dhoma të veçanta, të ndryshme nga dhomat klasike apo dhomat ku zhvillohen intervistat.
Para takimeve, oficerët kryejnë të gjitha kontrollet rituale, por siç konfirmojnë edhe mediat vendase, dhoma nuk monitorohet vazhdimisht, edhe për t'u lejuar të burgosurve njëfarë privatësie.
Policia e Stendalit ka nisur hetimet për zbardhjen e ngjarjes.
Sot, e premte 4 prill, është caktuar autopsia e trupit të gruas, një ekzaminim që mund të zbulojë shkakun e vdekjes.
Për momentin, prokuroria nuk ka dhënë informacione të mëtejshme mbi dinamikën e krimit apo për shkakun e mundshëm. Rezultatet e ekzaminimit të autopsisë priten në fillim të javës së ardhshme. Burgu Burg është më i madhi në shtetin lindor të Saksoni-Anhalt. Ai u përurua në vitin 2009 dhe mund të strehojë 650 të burgosur. Objekti është projektuar për të strehuar të burgosur afatgjatë, duke përfshirë edhe ata të sigurisë së lartë.
Lini një Përgjigje