FLASH
Shkruar nga Pamfleti
Komisioneri i Lartë i Bordit të Paqes për Gazën, Nikolai Mladenov, gjatë një takimi me shtypin e huaj në Jerusalem, deklaroi se Bordi nuk po kërkon zhdukjen e Hamasit si lëvizje politike, por vetëm çarmatimin e tij. Ai theksoi se ky kusht është i panegociueshëm.
"Ne nuk po i kërkojmë Hamasit të zhduket si lëvizje politike: një parti politike që heq dorë nga aktiviteti i armatosur mund të garojë në zgjedhjet kombëtare palestineze. Plani ynë i veprimit e lejon këtë mundësi. Ajo që është e panegociueshme është që fraksionet e armatosura të vazhdojnë të bashkëjetojnë me një autoritet kalimtar palestinez", tha Nikolai Mladenov.
Ai shtoi se në zonat ku Hamasi ka ende kontroll, po rrit influencën e tij duke taksuar dhe shtypur njerëzit të cilëve nuk u ka mbetur asgjë dhe duke penguar ndërtimin e infrastrukturave të reja për banorët e zhvendosur. Sipas Mladenov, nuk mund të zbatohet plani i bordit për rindërtimin e Gazës në këto kushte.
"Në zonat që ende kontrollon, Hamasi po konsolidon kontrollin e tij mbi popullsinë, duke taksuar njerëzit që jetojnë në rrugë dhe të cilëve nuk u ka mbetur asgjë, duke i penguar punëtorët dhe kontraktorët palestinezë që bashkëpunojnë me Bordin e Paqes të ndërtojnë komunitete të përkohshme që synojnë të ofrojnë strehim për banorët e zhvendosur të Gazës. Dhe e bën këtë për të marrë kushte më të mira në negociata, për të demonstruar se asgjë nuk lëviz në Gaza pa lejen e tyre. Por nuk mund të ndërtosh një të ardhme palestineze me grupe të armatosura që kontrollojnë rrugët, fshihen në tunele dhe grumbullojnë armë. Rindërtimi nuk mund të arrihet me milicitë në çdo hap", tha Mladenov.
Gjithashtu ai theksoi se Bordi i Paqes ka punuar që nga dhjetori me vendet ndërmjetëse, Egjiptin, Turqinë, Katarin dhe Shtetet e Bashkuara, për ta përkthyer planin 20-pikësh të Trump në një plan të detajuar për zbatimin e tij.
"Për këtë arsye, ne jemi takuar me delegacionin e Hamasit në Kajro shumë herë. Kjo është hera e parë që Gaza ka një plan për të ardhmen. Një plan të menduar mirë, të arritshëm për të gjithë banorët e Gazës", tha Mladenov.
Lini një Përgjigje