FLASH
Shkruar nga Pamfleti
Këshilli Kushtetues i Gjykatës Supreme të Venezuelës urdhëroi që zëvendëspresidentja Delcy Rodriguez të marrë përsipër detyrën e presidentit të përkohshëm në mungesë të Nicolas Maduro, i cili u arrestua mëngjesin e së shtunës në një operacion nga forcat amerikane.
Vendimi i gjykatës thotë se Rodriguez do të marrë përsipër "funksionin e presidentit të Republikës së Venezuelës, me qëllim garantimin e vazhdimësisë administrative dhe mbrojtjes gjithëpërfshirëse të kombit", raporton Reuters.
Vendimi shton se gjykata do ta shqyrtojë çështjen me qëllim që të “përcaktojë kuadrin ligjor të zbatueshëm në mënyrë që të garantojë vazhdimësinë e shtetit, menaxhimin e qeverisë dhe mbrojtjen e sovranitetit përballë mungesës së detyruar të Presidentit të Republikës”.
Ushtria amerikane kreu një operacion në Karakas, në të cilin u arrestua presidenti i Venezuelës, Nicolas Maduro, i cili më pas u dërgua në SHBA dhe u ndalua në Nju Jork.
Aeroplani që transportonte Maduron u ul pranë Nju Jorkut të shtunën në mbrëmje, pas së cilës ai u transportua në qytet me helikopter, përpara se të merrej me një konvoj të madh dhe nën eskortë të rëndë policore në Qendrën e Paraburgimit Metropolitan në Brooklyn, raporton Reuters.
Pamjet e publikuara nga autoritetet amerikane tregojnë Maduron të prangosur dhe me sy të lidhur gjatë fluturimit, më pas duke u shoqëruar në një korridor në zyrat e Agjencisë Amerikane të Zbatimit të Ligjit kundër Drogave, ku ai u dëgjua duke i uruar një "Gëzuar Vitin e Ri".
Kryebashkiaku i Nju Jorkut, Zohran Mamdani, dënoi “sulmin e njëanshëm” të Shteteve të Bashkuara ndaj Venezuelës, duke thënë se ishte një akt lufte dhe shkelje e ligjit federal, si dhe atij ndërkombëtar.
Lini një Përgjigje