FLASH
Shkruar nga Pamfleti
Prokurorët pretendojnë se Trump ua tregoi dokumentet njerëzve që nuk kishin leje sigurie për t'i shqyrtuar dhe më vonë ai u përpoqën t'i fshehë dokumentet. Akuzat kryesore parashikojnë një dënim deri në 20 vjet burg...
Aktakuza ndaj Donald Trump për keqpërdorim të dokumenteve të klasifikuara, përfaqëson rrezikun ligjor më serioz deri më tani për ish-presidentin e Shteteve të Bashkuara. Rrezik që vjen më pak se tre muaj pas akuzave në Nju Jork për falsifikim të të dhënave të biznesit.
Trump përballet me 37 akuza në lidhje me keqpërdorimin e dokumenteve të klasifikuara, sipas aktakuzës së zbardhur të premten. Akuzat përfshijnë dyshime për mbajtjen e informacionit të klasifikuar, pengimin e drejtësisë dhe dhënien e deklaratave të rreme.
Trump akuzohet për mbajtjen e dokumenteve që lidhen me "armët bërthamore në Shtetet e Bashkuara" dhe "aftësinë bërthamore të një vendi të huaj", së bashku me dokumente nga konferencat e inteligjencës së Shtëpisë së Bardhë, duke përfshirë disa që detajojnë aftësitë ushtarake të SHBA-së dhe vendeve të tjera.
Prokurorët pretendojnë se Trump ua tregoi dokumentet njerëzve që nuk kishin leje sigurie për t'i shqyrtuar dhe më vonë ai u përpoqën t'i fshehë dokumentet. Akuzat kryesore parashikojnë një dënim deri në 20 vjet burg.
Departamenti i Drejtësisë zbuloi aktakuzën të premten, hera e parë që departamenti konfirmoi se Trump po akuzohej për një krim.
Trump është planifikuar të paraqitet në gjykatë të martën në Floridën e Jugut. Nuk është e qartë se si do të zhvillohet procesi kundër tij.
Avokati i Trump tha se ndaj tij janë ngritur shtatë akuza penale duke përfshirë shkelje të Aktit të Spiunazhit, pengim të drejtësisë dhe komplot. Asnjë prej tyre nuk do ta ndalonte Trumpin nga detyra nëse ai dënohet.
Gjyqi final do të zhvillohet shumë muaj më pas dhe Trump mund të bëjë fushatë lirisht gjatë kësaj kohe.
Kushtetuta e SHBA kërkon vetëm që kandidatët presidencialë të jenë shtetas amerikanë të lindur natyral, të cilët janë të paktën 35 vjeç dhe kanë jetuar në vend për 14 vjet.
Trump tha të enjten në platformën e tij “Truth Social” se ai është i pafajshëm. Ai do të jetë i lirë të bëjë fushatë edhe nëse dënohet dhe dërgohet në burg dhe ekspertët ligjorë thonë se nuk do të kishte asnjë bazë për të bllokuar betimin e tij si president edhe nëse ai burgoset, megjithëse kjo do të shtronte pyetje të jashtëzakonshme logjistike dhe sigurie.
Është e paqartë se çfarë efekti do të ketë në qëndrimin e Trump me votuesit. Sondazhet i japin avantazh Trump-it dhe ai shihet si favorit në garën brenda republikanëve.
Dhe siç tregoi rasti i Nju Jorkut, akuzat penale kanë qenë historikisht një ndihmë për mbledhjen e fondeve të tij. Fushata njoftoi se kishte mbledhur të paktën 4 milionë dollarë në 24 orët pasi ajo aktakuzë u bë publike, duke thyer shumë rekordin e saj të mëparshëm pas kontrollit të FBI-së në klubin Mar-a-Lago.
Ai ka përdorur rastet dhe hetimet me të cilat përballet si mjete për mbledhjen e fondeve, duke u thënë mbështetësve se është nën sulm dhe ka nevojë për ndihmën e tyre. /Përshtati “Pamfleti” nga “Al Jazeera”
Lini një Përgjigje