FLASH
Shkruar nga Pamfleti
Një zhvendosje e dukshme në perceptimet gjeopolitike të rusëve ka dalë në pah nga sondazhi më i fundit i realizuar nga Qendra e Pavarur Levada. Krahasuar me vitet e kaluara, rezultatet tregojnë një rënie të konsiderueshme të ndjenjave armiqësore ndaj Shteteve të Bashkuara dhe një rritje të ndjeshme të mosbesimit ndaj vendeve të tjera perëndimore si Gjermania dhe Britania e Madhe.
Për herë të parë që nga viti 2013, SHBA nuk është më vendi që perceptohet si më armiqësori. Në vend të saj, Gjermania kryeson listën me 55% të rusëve që e konsiderojnë si vend armiqësor, e ndjekur nga Britania e Madhe me 49% dhe Ukraina me 43%. SHBA renditet në vendin e katërt me 40%, një rënie e ndjeshme prej 36 pikësh përqindjeje krahasuar me majin 2024. Ky ndryshim lidhet me perceptimin më të moderuar të brezit të ri, që SHBA-në e shohin më shumë si një vend turistik sesa si armik politik.
Në listën e shteteve me perceptim negativ përfshihen gjithashtu:
Polonia (37%),
Franca (32%),
Vendet baltike si Lituania dhe Letonia (28%).
Analistët e Levada-s theksojnë se kjo prirje lidhet ngushtë me qëndrimin kritik të vendeve të NATO-s dhe BE-së ndaj luftës në Ukrainë dhe me sanksionet ndaj elitës ekonomike dhe sektorëve strategjikë rusë.
Në anën tjetër, kur bëhet fjalë për vendet mike, perceptimi i publikut rus anon qartësisht nga Lindja. Bjellorusia shihet si aleati më i ngushtë me 80%, e ndjekur nga Kina me 64%, Kazakistani (36%), India (32%) dhe Koreja e Veriut (30%). Mbështetja ndaj Kinës dhe Bjellorusisë ka njohur rritje të vazhdueshme që nga viti 2012, ndërsa India ka fituar simpati veçanërisht pas vitit 2022 në kontekstin e luftës në Ukrainë.
Ndërkohë, perceptimi për Iranin dhe Armeninë si aleatë ka rënë ndjeshëm, përkatësisht në 11% dhe 9%.
Sa i përket Bashkimit Europian, qëndrimi i shumicës është negativ: 64% e rusëve kanë një mendim të keq, ndërsa vetëm 21% shprehin një qëndrim pozitiv. Megjithatë, mes të rinjve nën 24 vjeç, kjo shifër pozitive rritet në 38%, veçanërisht tek ata që informohen nga burime alternative si YouTube, në dallim nga ata që ndjekin vetëm televizione shtetërore.
Rezultatet e sondazhit tregojnë qartë një orientim të ri në opinionin publik rus, me një theks të fortë drejt aleancave lindore dhe largim të vazhdueshëm nga bashkëpunimi me Perëndimin.
Lini një Përgjigje