FLASH
Shkruar nga Pamfleti
Zëdhënësja e Shtëpisë së Bardhë, Karoline Leavitt, doli sot para gazetarëve për të komentuar "ndryshimin dramatik" në politikën e administratës Trump ndaj Rusisë, kulmuar me vendosjen e sanksioneve të reja dje ndaj dy gjigantëve të naftës ruse, Rosneft dhe Lukoil.
Kjo lëvizje, e cilësuar si një kthesë e mprehtë nga politika e mëparshme më e butë e Trump-it, vjen në mes të përpjekjeve për të shtyrë Mosken drejt një armëpushimi në Ukrainë.
Në një konferencë shtypi të mbajtur në Shtëpinë e Bardhë, Leavitt u përball me pyetje mbi arsyet e këtij ndryshimi të shpejtë, por ajo tha se presidenti ka qenë gjithmonë i hapur për masa të ashpra kur situata e kërkon.
"Presidenti gjithmonë ka pohuar se do të zbatojë sanksione ndaj Rusisë kur ta ketë ndier të përshtatshme dhe të nevojshme, dhe dje ishte ajo ditë", deklaroi ajo, duke iu referuar vendimit të Departamentit të Thesarit për të goditur ekonominë ruse në sektorin e energjisë.
Leavitt nuk kurseu kritikat ndaj Kremlinit, duke përsëritur zhgënjimin e Trump-it me Vladimir Putinin.
"Mendoj se presidenti ka shprehur prej kohësh edhe zhgënjimin e tij me Vladimir Putinin dhe, sinqerisht, me të dyja palët e kësaj lufte", tha ajo, duke theksuar se administrata nuk ka parë mjaftueshëm interes nga ana ruse për të "çuar topin përpara drejt paqes".
Megjithatë, zëdhënësja nuk mbylli derën plotësisht për një takim të ardhshëm.
"Një takim midis këtyre dy udhëheqësve nuk është krejtësisht i pamundur. Mendoj se presidenti dhe e gjithë administrata shpresojnë që një ditë kjo të ndodhë përsëri. Por ne duam të sigurohemi që të ketë një rezultat të prekshëm dhe pozitiv nga ai takim dhe që të jetë një përdorim i mirë i kohës së presidentit", shtoi Leavitt.
Lini një Përgjigje