FLASH
Shkruar nga Pamfleti
Bjellorusia mban sot zgjedhjet presidenciale, me presidentin Aleksandër Lukashenko që hodhi votën e tij për të qëndruar edhe 5 vite të tjera në pushtet.
Presidenti shoqërohej edhe nga qeni i tij në momentin e votimit.
Sipas exit poll-ve, bjellorusët pritet që t’i japin një tjetër mandat 5-vjeçar presidentit autoritar Aleksandër Lukashenko, i cili është mik i ngushtë i kreut të Kremlinit, Vladimir Putin.
Lufta e Rusisë në Ukrainë i ka bashkuar Lukashenkon dhe Putinin më shumë se kurrë më parë, pasi lideri autoritar i ka ofruar homologut rus vendin e tij si platformë për ta nisur pushtimin e Ukrainës në shkurt 2022, ndërsa në vitin pasues u pajtua ta lejojë Moskën të vendosë armë taktike bërthamore në Bjellorusi.
Shtetet e Bashkuara dhe Bashkimi Evropian thanë para ketyre zgjedhjeve se votimi nuk mund të jetë i lirë dhe i drejtë, për shkak se mediat e pavarura janë të ndaluara në Bjellorusi dhe të gjitha figurat kryesore opozitare ose janë burgosur, ose janë detyruar të ikin nga vendi.
“Lukashenko është ngjitur në pushtet për 30 vjet. Nesër, ai do të riemëroj veten në zgjedhje të rreme. Kjo është një fyerje e hapur ndaj demokracisë. Lukashenko nuk ka legjitimitet”, tha përfaqësuesja e lartë e BE-së, Kaja Kallas.
Lukashenko dikur një drejtues sovjetik thotë se është populli që ka zgjedhur ta mbajë atë në pushtet që nga viti 1994.
Ai përballet me katër kandidatë të tjerë, asnjëri prej të cilëve nuk ka bërë ndonjë kritikë serioze. 6.9 milionë njerëz janë regjistruar për të votuar.
Lini një Përgjigje