FLASH
Shkruar nga Pamfleti
Analisti Ergys Mërtiri ka komentuar rreth vizitave të Ramës me emigrantët shqiptarë në Europë, por edhe të Bashës dhe Metës së shpejti.
Ai shprehet se politika shqiptare e përdor diasporën për të marrë vota elektorale brenda vendit, pasi atyre jashtë nuk i zgjidh asnjë punë.
“Kjo është PR, qeveria kërkon të tregoj kujdesin që kanë për emigrantët dhe lidhjet e forta me njerëzit përtej vendit, por në fakt nuk bëjnë atë që duhet të bëjnë. Është çështje koncepti, por këtu nuk ka debat. Nuk e thonë që janë kundër votës së emigrantëve, thonë që janë pro dhe në fund askush nuk ja jep votën emigrantëve.
Kjo për mua është hipokrizi. E shoh si instrumentalizim të diasporës përderisa nuk bën asgjë për ta, por bën takime me ta. E përdor për llogari të politikës së brendshme. Shteti duhet të krijoj mekanizma që shqiptarët jashtë vendit të mos vuajnë. Bën takime me ata jashtë për të marrë votat e këtyre brenda”, tha Mërtiri për “Report Tv”.
Lidhur me qëndrimet PS-PD për zgjatjen e mandatit të kreut të SPAK dhe prokurorëve të tjerë, Mërtiri është i mendimit se kjo duhet aprovuar.
“Zoti Basha është pozicionuar tashmë prej kohësh pro SPAK-ut. Dhe kjo duket pasi asnjë nga Partia Demokratike zyrtare nuk ka punë me SPAK. Nuk janë ajo pjesë e kërcënuar, pjesa e vjetër e PD kanë shkuar tek zoti Berisha dhe mundësitë për t’u kërcënuar janë atje. Qeveria dukshëm është shfaqur në kundërshtim me zgjatjen e mandatit.
Mendoj se duhet ta bëjë. SPAK po prodhon reagim tek shqiptarët, realisht po lufton korrupsionin. Nisje e mirë, kemi qenë goxha të vonuar pasi mandatin e parë para se të vinte Dumani nuk është bërë asgjë. Duhet të hapet procedura për zgjatjen e mandatit. PS dukshëm po pengon e SPAK”, u shpreh Mërtiri.
Ai shton se Meta dhe Berisha kanë një luftë të hapur me SPAK, pasi ky i fundit po lufton korrupsionin.
“Meta dhe Berisha e kanë luftë të drejtpërdrejtë me SPAK-un. Nuk u intereson që ka një institucion serioz që po lufton korrupsionin. Ata nuk e kanë qëllim që të luftojnë korrupsionin, sepse do ta kishin bërë. Ata nuk kanë interes as të bëjnë opozitë. Pasi SPAK është e vetmja që po i bën opozitë qeverisë, duke çuar përpara drejtësisë një pjesë të bashkëpunëtorëve të kryeministrit”, thekson analisti.
Lini një Përgjigje