FLASH
Shkruar nga Pamfleti
Bandat shqiptare të drogës po rekrutojnë hapur fermerë kanabisi në TikTok mes mungesës së punëtorëve në Britani.
Bosët e bandave po përdorin mediat sociale për të reklamuar krijimin e vendeve të punës, ku punëtorët e fermave nuk paguhen më me para në dorë, por do të marrin deri në 30 për qind të fitimeve nga shitja e drogës.
Stimujt financiarë janë bërë të nevojshëm për shkak të rënies dramatike të numrit të shqiptarëve që hyjnë ilegalisht në Mbretërinë e Bashkuar me varka të vogla dhe një rritje të mprehtë të numrit të shqiptarëve që burgosen për kultivim kanabisi ose deportohen pas mbërritjes në Britani.
Duke komentuar zbulimet e Telegrafit këtë fundjavë, Angela Eagle, Ministrja e Sigurisë Kufitare, tha: “Është tronditëse që bandat kriminale përdorin mediat sociale për mashtruar të rinjtë, duke i joshur ata të punojnë në kushte të neveritshme dhe të kultivojnë drogë si kanabisi me premtime të rreme fitimi”.
Bandat shqiptare kanë arritur të dominojnë tregun vendas të kanabisit, ku bimët rriten në shtëpi apo ambiente industriale të lira duke përdorur teknologjinë hidroponike të importuar nga fermat e vendlindjes së tyre.
Në dekadën e kaluar, ata kanë uzurpuar vietnamezët si furnizuesit kryesorë të kanabisit për përdoruesit në Mbretërinë e Bashkuar.
Një reklamë në shqip, e parë nga “The Telegraph”, thoshte: “Unë jam pronar i një shtëpie me kanabis. Kam pasur përplasje me punëtorin që kisha. Tani jam gati të ofroj 30 për qind të fitimit për këdo që ofrohet të punojë, duke mbuluar shpenzimet e përditshme”.
Një tjetër shprehej: “Kërkojmë punëtorë për shtëpi bari. Nëse kujdeseni për 80 bimë, merrni 25 për qind të produktit dhe ne paguajmë shpenzimet. Koment ose DM”.
Një i tretë ofroi një pagë prej 9,000 £ për punë tre mujore brenda një shtëpie kanabisi, duke përfshirë rritjen e bimëve, korrjen dhe paketimin. /Përshtati “Pamfleti” nga “The Telegraph”
Lini një Përgjigje