FLASH
Shkruar nga Pamfleti
Shefja e Departamentit të Epidemiologjisë pranë ISHP-së, Silva Bino ditën e sotme është paraqitur në Prokurorinë e Posaçme.
Mësohet se ajo ka qëndruar në ambientet e SPAK për rreth një orë.
Pas daljes nga Prokuroria e Posaçme ajo ka thënë për mediat vetëm: “Isha për një punë, s’kam asgjë për të thënë”
Kujtojmë se mjekja e njohur ka mbajtur një sërë postesh drejtuese në Ministrinë e Shëndetësisë. Së fundmi, në këtë ministri ka pasur edhe dy arrestime.
Në pranga për abuzimet me një tender, ka rënë sekretarja e Përgjithshme e Ministrisë së Shëndetësisë, Joana Duro dhe specialistja Luara Shteto.
Ministria e Shëndetësisë ka qenë në qendër të diskutimeve ditët e fundit, pas arrestimit të sekretares së përgjithshme Joana Duro dhe zyrtares tjetër Laura Shteto, ndërsa ende nuk dihet nëse dëshmia e Binos në SPAK ka lidhje me këtë ngjarje.
Një ditë më parë Gjykata e Posaçme Antikorrupsion vendosi t’i lejë në burg dy zyrtaret. Sekretarja e përgjithshme e Ministrisë së Shëndetësisë, Joana Duro, e cila kishte një vit që e mbante këtë post u gjurmua nga SPAK pasi iu paguan 330 mijë lekë për favorizim në një tender ku garonin tetë kompani. Shuma sipas versionit zyrtar të Prokurorisë së Posaçme, iu pagua sekretares së përgjithshme nga një tjetër nëpunëse e shtetit, e identifikuar si Laureta Sheto, me detyrë specialiste e nivelit të lartë të Agjencisë së Shërbimeve Publike të Integruara.
SPAK thekson se janë paratë përfitim i parregullt, janë sekuestruar në vazhdimësinë e operacionit, në zyrat e sekretares së përgjithshme, që gjenden në Ministrinë e Shëndetësisë.
Megjithatë, rezulton se Ministria e Shëndetësisë si autoriteti kontraktues që është denoncuar disa herë në SPAK për tenderat, hapi garën në 10 maj dhe e mbylli në datën 22 me objekt kontratë shërbimi. Fituesi, që është një kompani e themeluar në vitin 2015, dyshohet se u favorizua. Pas arrestimit të tyre, SPAK arrestoi edhe administratorin dhe inxhinierin e firmës “Dricons” të cilët kishin paguar 330 mijë lek ryshfet me qëllim për të përfituar në mënyrë të paligjshme nga tenderi i zhvilluar në Ministrinë e Shëndetësisë e Mbrojtjes Sociale, me objekt “Lot 1 “Supervizim për rikonstruksionin e disa Qendrave Shëndetësore në qarqet Tiranë e Durrës”.
Lini një Përgjigje