FLASH
Shkruar nga Pamfleti
Ata shfaqen duke u larguar me vrap pasi kanë goditur me doreza hekuri avokatin, i cili ndodhet në intubim në spitalin e Traumës në Tiranë.
Publikohen pamjet e dy autorëve që dhunuan mëngjesin e sotëm avokatin Sokol Mëngjesi, me mjete të forta në zonën e ish-Bllokut në Tiranë, sapo kishte çuar fëmijën e tij në kopësht.
Në foton e siguruar, dhunuesit e avokatit duken të veshur me rroba të zeza dhe me kapele në kokë. Ata shfaqen duke u larguar me vrap pasi kanë goditur me doreza hekuri avokatin, i cili ndodhet në intubim në spitalin e Traumës në Tiranë.
Policia, disa orë pas ngjarjes ka shoqëruar dy persona, që po merren në pyetje lidhur me ngjarjen e rëndë.
Kujtojmë se ngjarja ndodhi pranë kopshtit 31, në zonën e ish-Bllokut ku avokati sapo kishte çuar fëmijën. Agresorët i zunë pritë, teksa Sokol mëngjesi po lëvizte në këmbë, në një zonë të frekuentuar nga shumë qytetarë e të mbuluar me kamera sigurie dhe e goditën disa herë në kokë duke e lënë pa ndjenja.
Pasi e quajtën misionin e tyre të kryer dhunuesit u larguan në këmbë nëpër rrugica ku i priste një automjet. Ndërsa avokati u transportua me urgjencë drejt spitalit.
Prej orës 08:30 avokati ndodhet në reanimacion, ku po i nënshtrohet ekzaminimeve. Atij iu bë skaneri, ku u evidentuan dy hematoma në kokë për të cilat do të pritet për 48 orë për të parë parametrat shëndetësorë të tij.
Nga ana tjetër Policia e Tiranës ka ngritur një grup hetimor për zbardhen e kësaj ngjarje të rëndë. Kamerat e sigurisë kanë qenë një çelës për këtë hetim, ku falë tyre u arrit identifikimi i një prej agresorëve dhe mjetit me të cilin ata kanë lëvizur. Në zona të ndryshme të Tiranës janë ushtruar kontrolle me qëllim arrestimin e tyre.
Policia ende nuk është shprehur zyrtarisht për motivet e dhunës ndaj avokatit, por dyshimet kryesore janë se lidhet me detyrën. Sokol Mëngjesi prej muajsh është mbrojtës ligjor i ish-kryeministrit Sali Berisha për çështjen e privatizimit të ish-klubit sportiv “Partizani”.
Lini një Përgjigje