FLASH
Shkruar nga Pamfleti
Avokati Gentian Rumano ka deklaruar se Erion Veliaj ka të drejtë ta ankimojë në Gjykatë Kushtetuese vendimin për shkarkimin e tij nga posti i kryebashkiakut.
Sipas Rumanos, në vendimin e Këshillit Bashkiak për shkarkimin e kyebashkiakut ka dy shkelje procedurale; që nuk është dëgjuar dhe që nuk i është siguruar mbrojtja ligjore pasi nuk i janë parashtruar shkaqet e shkarkimit.
Me këto dy shkaqe, sqaroi Rumano, Kushtetuesja mund ta rrëzojë si të papajtueshëm me Kushtetutën vendimmarrjen e këshillit bashkiak, duke e lënë në detyrë Veliajn.
“Në momentin që nuk ke njoftuar shkakun për shkarkimin ke kryer shkelje procedurale. Me këto shkelje procedurale, shkaku për largimin e tij ka qenë që bashkia ka qenë pa drejtues, që nuk parashikohet nga neni 62, por është një shkak në interesin publik, pra duhet një kryebashkiak efiçent, që të jetë në punë. Në momentin që do ta ankimojë në Kushtetuese, me shkakun e parë, që nuk është dëgjuar dhe që nuk i është siguruar mbrojtja ligjore, duke mos i parashtruar shkakun e shkarkimit, që janë standarde të kushtetutës, kur t’i drejtohet kushtetueses, ka të drejtë ta rrëzojë këtë vendim dhe Veliaj të mbetet në detyrë duke e shpallur të papajtueshme vendimmarrjen e këshillit bashkiak dhe këshillit të ministrave. Ka një moment procedural, që mund të krijojë një ngërç ligjor; vendimi për propozimin e shkarkimit është akt administrativ, që duhet të goditet në Gjykatë Administrative apo një akt që duhet të goditet në Kushtetuese”, tha avokati.
Lini një Përgjigje