FLASH
Shkruar nga Pamfleti
Pas thirrjes së prokurorëve të SPAK pak javë më parë në Uashington, radhën për të marrë direktiva e patën krerët e lartë të gjyqësorit.
SHBA vijon përpjekjet e saj për të çuar përpara reformën e drejtësisë në vendin tonë. Pas thirrjes së prokurorëve të SPAK pak javë më parë në Uashington, radhën për të marrë direktiva e patën krerët e larët të gjyqësorit.
Kryetarja e Gjykatës Kushtetuese, Holta Zaçaj, Kryetari i Gjykatës së Lartë, Sokol Sadushi, zëvendëskryetari i Gjykatës së Lartë, Ilir Panda, dhe anëtarë të tjerë të Gjykatës Kushtetuese, ishin pjesë e delegacionit që vizitoi SHBA-në.
Në Uashington ata u pritën nga Zëvendës/ndihmësi i Prokurorit të Përgjithshëm, z. Bruce Swartz dhe Zëvendësndihmësja Kryesore e Sekretarit të Shtetit për Çështjet Evropiane dhe Euroaziatike, znj.Yuri Kim.
Fokusi i takimit ishte avancimi i reformës në drejtësi dhe shkëputja e drejtësisë së re nga influenca e politikës dhe krimit.
Drejtuesit e lartë të drejtësisë shqiptare morën garanci nga SHBA-ja për të vazhduar punën e tyre, pa u ndikuar nga faktorët e jashtëm.
Ky takim ishte gjithashtu një mesazh i qartë për politikën shqiptare, që të mbajnë duart larg nga drejtësia e re, pasi kjo e fundit ka nisur të bëjë disa manovra për të kontrolluar SPAK-un, duke krijuar një komision vëzhgues.
“Në kuadër të një vizite të përbashkët zyrtare në Shtetet e Bashkuara të Amerikës, në të cilën marrin pjesë Kryetarja e Gjykatës Kushtetuese, Holta Zaçaj, Kryetari i Gjykatës së Lartë, Sokol Sadushi, zëvendëskryetari i Gjykatës së Lartë, Ilir Panda, dhe anëtarë të tjerë të Gjykatës Kushtetuese, në datat 27 – 29 mars 2024, janë zhvilluar disa takime zyrtare me përfaqësues të lartë të institucioneve të drejtësisë në Washington D.C., me praninë edhe të Ambasadorit të Republikës së Shqipërisë në SHBA, z. Ervin Bushati.
Delegacioni shqiptar është takuar me Zëvendësndihmësin e Prokurorit të Përgjithshëm, z. Bruce Swartz dhe Zëvendësndihmësen Kryesore të Sekretarit të Shtetit për Çështjet Evropiane dhe Euroaziatike, znj.Yuri Kim.
Në fokus të takimeve ishte ecuria e reformës në drejtësi në Shqipëri dhe rëndësia që mbart realizimi me sukses i saj për krijimin e një sistemi gjyqësor eficient dhe të pavarur, me qëllim rritjen e besimit të publikut në dhënien e drejtësisë, si dhe ecjen përpara në rrugën e anëtarësimit të Shqipërisë në Bashkimin Evropian.
Kryetarja Zaçaj dhe Kryetari Sadushi, duke shprehur mirënjohjen për mbështetjen e dhënë nga Shtetet e Bashkuara të Amerikës, u ndalën tek sfidat me të cilat është përballur gjyqësori në Shqipëri, rikompozimin e plotë të të dy gjykatave, si edhe rezultatet pozitive drejt përmirësimit të vendimmarrjes, rritjes së efikasitetit dhe transparencës.
Nga ana e zyrtarëve të lartë të Departamentit të Drejtësisë dhe Departamentit të Shtetit, ata morën premtimin për të vazhduar mbështetjen e ofruar nga shteti amerikan për implementimin me sukses të reformës në drejtësi”, thuhet në njoftim e shpërndarë nga GJL.
Lini një Përgjigje