FLASH
Shkruar nga Pamfleti
Punimet për Korridorin 8 vijojnë të shoqërohen me shqetësime në zonat e banuara ku kalon ky aks.
Gjatë fundjavës, në Bradashesh, banesa e familjes Meta u përmbyt si pasojë e reshjeve të shiut. Sipas kryefamiljarit situata u përkeqësua pas ndërhyrjeve të kryera nga firma “Salillari” në shtratin e përroit të Kushes.
Ai deklaroi se rreth 500 metra katrorë sipërfaqe përreth banesës u mbuluan nga uji dhe skorjet e argjinaturës së dëmtuar.
Banori shprehet për "Syri Tv" se momentet e para ishin të vështira dhe se kjo është hera e dytë që përroi del nga shtrati që prej nisjes së punimeve, duke pretenduar se në shtratin e tij janë vendosur gjashtë këmbë ure.
Kryefamiljari deklaron se rrjedha e ujit mori me vete 20 koshere bletësh dhe rreth 80 pula, ndërsa arriti të shpëtojë lopën. Sipas tij, deri më tani nuk janë marrë masa për të shmangur përsëritjen e situatës.
Në lidhje me dëmshpërblimin, banori pretendon se drejtues të firmës zbatuese e kanë konsideruar përmbytjen si pasojë të faktorëve natyrorë dhe jo të punimeve në terren.
Banorët e zonës shprehen të shqetësuar për mundësinë e përmbytjeve të tjera.
"I jemi drejtuar bashkisë për zgjidhje, por nuk kemi marrë përgjigje zyrtare", thotë një banor.
Lini një Përgjigje