FLASH
Shkruar nga Pamfleti
Analisti Neritan Sejamini e quajti naivitet besimin e shprehur nga e djathta në Shqipëri se fitorja e kandidatit republikan, Donald Trump në zgjedhjet e nesërme në SHBA do të zgjidhë problemet në Shqipëri dhe Kosovë.
Sejamini u shpreh se problemet që ka Shqipëria dhe Kosova janë më të thella dhe nuk zgjidhen me një “deus ex machina”, ndërsa shtoi se Trump është i paparashikueshëm.
“Ka një farë naiviteti te e djathta shqiptare. Problemet që ka Shqipëria dhe Kosova janë më të thella dhe nuk zgjidhen me një “deus ex machina”. Do të vijë dikush atje në Amerikë dhe do t’i zgjidhë problemet! Trump është i paparashikueshëm dhe ka prioritet të tij dominancën personale që të tregojë se ai zgjidh gjërat. Është njeri krenar në aftësi për të negociuar, për jetën e tij kur ka ditur që të zgjidhë mosmarrëveshjet etj.
Ai edhe në politikë pati një qasje të tillë. Edhe në çështje të rëndësishme, siç ishte ajo e Kosovës që donte ta zgjidhte si në triumf të politikës së jashtme që atij i duhej për të rritur mitin e tij se ai zgjidh gjërat e mëdha.
Por kjo lloj qasje për fitime personale, ku marrëdhëniet nuk janë zyrtare, por “më jep diçka, të të jap diçka” e bën atë të paparashikueshëm në mos të dëmshëm për Shqipërinë, duke pasur parasysh Kosovën, duke qenë se Serbia ka lobim të jashtëzakonshëm në SHBA.
Është naive që të mendosh se do të vijë Trump-i dhe do të heqë non gratën e zotit Berisha, do të fusë Kosovën në NATO, do të zgjidhë konfliktin Kosovë-Serbi në favor të Kosovës. Gjasat që këto të ndodhin janë zero. Kosova nuk po futet dot në Këshillin e Evropës jo më në NATO”, u shpreh Sejamini për “TPZ”.
Lini një Përgjigje