FLASH
Shkruar nga Pamfleti
Ndeshja e parë e Franko Mastantuonos për Realin e Madridit ka shkaktuar një polemikë të vërtetë në Spanjë që përfshin më shumë sesa vetëm çështje të fushës.
“Los Blancos” rrezikojnë të humbasin fitoren e tyre kundër Osasunës për shkak të futjes së argjentinasit, e cila dyshohet se çoi në një shkelje serioze të rregullave:
Miguel Galan, presidenti i CENAFE (qendra e trajnimit të trajnerëve në Spanjë), ka paraqitur një ankesë në lidhje me sjelljen e papërshtatshme të ekipit të Çabi Alonsos, i cili dyshohet se shkeli rregullat duke dërguar yllin e tyre të ri në fushë.
Problemi qendron në mënyrën se si u regjistrua sulmuesi, një veprim i kryer me keqbesim sipas avokatit, i cili hap mundësinë e një ankese nga kundërshtarët dhe një humbje të mundshme në tavolinë.
Por çfarë ndodhi dhe si i shkeli Reali i Madridit rregullat?
Reali pagoi 60 milionë euro për ta marrë nga River Plejt dhe tifozët mezi prisnin ta shihnin atë në fushë. Kur ai hyri në “Santiago Bernabeu” për herë të parë në minutën e 65 të ndeshjes së tyre të parë në La Liga, i gjithë stadiumi shpërtheu në duartrokitje, por ato pak minuta mund t’i kushtojnë një humbje në tavolinë madrilenëve.
Ankesa vjen nga Galan, i cili citon rregullat: Mastantuono është në fakt një lojtar i ekipit të parë, por ishte regjistruar si lojtar i Kastijas, në thelb ekipi i dytë i Realit që luan në kategorinë e tretë.
Nuk ka asgjë të keqe me këtë, duke pasur parasysh se është i njëjti klub, por sipas avokatit, kjo është një dredhi për të kapërcyer pengesën e 25 vendeve në ekipin e parë: duke regjistruar lojtarin te Kastija, Reali i Madridit nuk do të zinte një vend në ekipin e parë dhe kështu do të ishte në gjendje të regjistronte më shumë lojtarë sesa lejohet.
Sipas nenit 125 të rregullores së RFEF, regjistrimi i një lojtari në ekipet zinxhir nuk mund të përdoret për të anashkaluar frymën e rregullave dhe për këtë arsye “Los Blancos” kanë vepruar me keqbesim, sipas Galan.
Nëse verifikohet, mashtrimi burokratik mund të ketë pasoja serioze: Osasuna ka 24 orë kohë pas përfundimit të ndeshjes (të luajtur mbrëmë) për të paraqitur një ankesë dhe për të raportuar regjistrimin e parregullt të Mastantuonos.
Nëse shkelja do të verifikohej, Reali i Madridit do të rrezikonte humbjen e ndeshjes në tavolinë, si dhe do të dukej keq për anashkalimin e një rregulli themelor për të gjitha ekipet.
Lini një Përgjigje