FLASH
Shkruar nga Pamfleti
Na ndajnë edhe 12 ditë nga ndeshjet e Shqipërisë dhe Kosovës për fazën “play-off” të Kupës së Botës. Shqipëria do të udhëtojë drejt Varshavës, e ku do të “përplaset” me Poloninë, ndërsa sulmuesi Fisnik Asllani me shokë drejt Brastislavës, aty ku i pret Sllovakia.
Pikërisht në Sllovaki, mediat vendase kanë filluar të shqetësohen për shqiptarët e Kosovës. “Sportovy.cas” i ka kushtuar një rëndësi të veçantë numrit të lartë të tifozëve miq në ndeshjen e datës 26 mars, ndërsa artikulli mban titullin:
“Një natë e nxehtë futbolli i pret sllovakët: Kosova po bëhet gati të pushtojë Bratislavën”. Një qasje e tillë është diktuar edhe te tifozët, ku aludohet se shumë shqiptar të trojeve tona kanë siguruar biletë në sektorin e vendasve.
Artikulli:
Kombëtarja e Sllovakisë po përballet me një nga ndeshjet më të rëndësishme të viteve të fundit. Më 26 mars, skuadra e trajnerit Françesko Kalcona do të përballet me kombëtaren e Kosovës në Bratisllavë në gjysmëfinalen e “play-offit” për Botërorin 2026, që do të zhvillohet në Kanada, Meksikë dhe SHBA.
Ndeshja do të luhet në stadiumin ‘Tehelné pole’ dhe pritet një atmosferë shumë e zjarrtë. Arsyeja është e qartë: tifozët e Kosovës kanë shitur të gjitha biletat në sektorin e tyre.
Sipas sistemit të biletave, sektori i mysafirëve u mbush shumë shpejt dhe pritet që tifozë kosovarë të vijnë në numër të madh për ta mbështetur ekipin e tyre. Ndeshje të tilla njihen për atmosferën e zhurmshme dhe të tensionuar, pasi tifozët kosovarë konsiderohen ndër më pasionantët në Evropë dhe shpesh krijojnë atmosferë shumë të fortë edhe në stadiumet e kundërshtarëve.
Sipas zëdhënësit të Federatës së Futbollit të Sllovakisë, Zhuraj Çurni, Federata e Futbollit e Kosovës ka marrë kuotën prej 1000 biletash për sektorin mysafir, sipas rregullave të UEFA-s.
Pas publikimit të lajmit për sektorin e mbushur të mysafirëve, disa tifozë sllovakë shprehën shqetësim, duke kujtuar një rast nga viti 2013. Atëherë, në një ndeshje kualifikuese për Botërorin e 2014-ës kundër kombëtares së Bosnjës dhe Hercegovinës në Zhilina, rreth 80% e tifozëve në stadium mbështetnin mysafirët. Ndeshja përfundoi 1-2, edhe pse sllovakët kishin kaluar në epërsi me golin e Marek Hamshík.
Megjithatë, sipas federatës sllovake, një skenar i tillë nuk pritet këtë herë. Ndeshja është e shitur plotësisht dhe tifozët sllovakë duhet të kenë shumicën në stadium, edhe pse qindra bileta janë blerë nga persona me origjinë ballkanike që jetojnë në vende të BE-së, përfshirë edhe në Sllovaki.
Nëse Sllovakia fiton kundër Kosovës, do të ketë edhe një hap drejt Kupës së Botës. Në finalen e “play-offit” më 31 mars 2026 do të përballet me fituesin e ndeshjes mes Turqisë dhe Rumanisë.
Bratisllava pritet të përjetojë një natë shumë të zjarrtë futbolli, ku mbështetja e tifozëve mund të jetë vendimtare për vazhdimin e ëndrrës drejt Botërorit 2026
Lini një Përgjigje