FLASH
Shkruar nga Pamfleti
Ndeshja e sotme në Superligën e Kosovës mes Gjilanit dhe Malishevës ka parë skuadrat dhe tifozët të përjetonin disa momente ankthi dhe paniku në pjesën e dytë të saj.
Pas një dueli ajror, Oltion Bilalli i Gjilanit u përplas me portierin e Malishevës, Ilir Avdyli, duke përfunduar pa ndjenja në tokë. Një përplasje e rëndë e cila la lojtarin sulmues pa lëvizur në tokë, ndërsa futbollistët e të dyja skuadrave kërkuan me shpejtësi ndërhyrjen e stafit mjekësor dhe afrimin e ambulancës.
Ndeshja u ndërpre për rreth 15 minuta teksa iu dha ndihma Bilallit, i cili më pas u dërgua në spital për vizita më të hollësishme. Situatën e tij e ka shpjeguar pas ndeshjes për mediat kosovare drejtori i Gjilanit, Syart Rrahmani.
“Në bazë të informatave që kemi marrë, Oltioni ka gjakderdhje të brendshme në kokë. Sipas mjekëve, është jashtë rrezikut për jetën, por do të shohim. Oltionin e kanë nisur për në QKUK në Prishtinë. Edhe ne tash do të nisemi drejt Prishtinës”, ishin fjalët e tij për “Koha”.
Lini një Përgjigje