FLASH
Shkruar nga Pamfleti
Anglia i filloi përgatitjet në prag të Europianit, me triumfin 3-0 ndaj Bosnjës në miqësoren e zhvilluar mbrëmjen e sotme në stadiumin “St.James Park” të Njukastëllit.
Pjesa e parë u mbyll me rrjeta të paprekura, teksa në fragmentin e dytë të lojës, “3 Luanët” shënuan plot 3 gola, duke kënaqur tifozët e pranishëm në shkallët e stadiumit.
Sulmuesi i Çelsit, Palmer, ishte ai që zhbllokoi sfidën në minutën e 60, duke shënuar nga pika e bardhë e penalltisë, ndërkohë që Aleksandër Arnold dhe Herri Kejn, shënuan dy golat e tjerë në minutat 85 dhe 89 për të “vulosur” shifrat në 3-0.
Vlen të theksohet fakti se në Europian, Anglia bën pjesë në Grupin C së bashku me Slloveninë, Danimarkën dhe Serbinë. Ndeshjen e parë “3 Luanët” do e luajnë më 16 qershor ndaj Serbisë në orën 21:00.
Gjermania nuk shkoi më shumë se barazimi 0-0 në miqësoren e zhvilluar në stadiumin e Nurembergut ndaj Ukrainës.
Pavarësisht përpjekjeve të shumta, “Panzerat” nuk arritën të gjenin rrugën e rrjetës, duke regjistruar 5 gjuajtje në kuadrat dhe plot 13 jashtë portës.
Interesant është fakti se i gatshëm në këtë duel ishte dhe sulmuesi me origjinë shqiptare, Brajan Gruda, i cili e ndoqi duelin nga stoli, teksa mbante fanellën me numrin 9.
Para miqësores së sotme, Gruda pati dhe një takim me legjendën gjermane Bastjan Shvajshtajger.
Miqësoren e radhës, Gjermania do ta luajë në datën 7 qershor ndaj Greqisë në stadiumin “Borusia Park” të Mynshenglabah.
Lini një Përgjigje