FLASH
Shkruar nga Pamfleti
Detaje të reja kanë dalë në dritë lidhur me vdekjen e aktorit Matthew Perry në vitin 2023, ndërsa autoritetet amerikane vijojnë hetimet për rrethanat që çuan në humbjen e tij.
Sipas prokurorëve federalë, ish-asistenti i aktorit, Kenneth Iwamasa, dyshohet se ka nisur përpjekjet për të fshehur prova vetëm një orë pas vdekjes së Perry-t, i cili u gjet pa shenja jete më 29 tetor në vaskën me ujë të nxehtë në banesën e tij në Kaliforni.
Hetuesit pretendojnë se Iwamasa ka shkatërruar prova fizike dhe dixhitale që lidhen me përdorimin e ketaminës nga aktori, si dhe ka kërkuar që persona të tjerë të përfshihen në zhdukjen e materialeve që mund të lidhnin një rrjet furnizimi me substanca narkotike.
Ai është deklaruar fajtor për komplot për shpërndarjen e ketaminës që rezultoi në vdekje, pas një marrëveshjeje me autoritetet në vitin 2024. Prokuroria amerikane po kërkon për të një dënim prej 41 muajsh burgim, ndërsa fillimisht ai rrezikonte deri në 15 vite heqje lirie.
Dosja hetimore thekson gjithashtu se Iwamasa, pa trajnim mjekësor, dyshohet se i ka administruar vazhdimisht ketaminë aktorit, përfshirë edhe në orët e fundit para vdekjes së tij. Më tej, ai akuzohet se ka dhënë deklarata të rreme për autoritetet, duke tentuar të zhvendosë përgjegjësinë dhe të minimizojë rolin e tij në ngjarje.
Çështja pritet të mbyllet në seancat e ardhshme gjyqësore, ku do të përcaktohet edhe dënimi përfundimtar.
Lini një Përgjigje