FLASH
Shkruar nga Pamfleti
Tayna ka festuar tetë vjet nga nisja e karrierës së saj muzikore me një organizim special në Prizren, qytetin ku hodhi hapat e parë drejt suksesit.
Në këtë ngjarje morën pjesë familjarë, miq të afërt, bashkëpunëtorë dhe emra të njohur të industrisë muzikore, të cilët u bënë pjesë e një mbrëmjeje kushtuar rrugëtimit artistik të këngëtares.
Përveç atmosferës festive, aktiviteti u shfrytëzua edhe për prezantimin e albumit më të fundit, “Genesis”, një projekt që ka zgjuar interes të madh te publiku që prej publikimit.
Një moment i rëndësishëm i mbrëmjes ishte shfaqja premierë e dokumentarit të realizuar nga vetë artistja. Përmes tij, Tayna sjell detaje nga procesi i krijimit të albumit, sfidat gjatë realizimit dhe përkushtimin që ka shoqëruar këtë projekt.
Dokumentari përfshin pamje të xhiruara në disa qytete evropiane, mes tyre Berlini dhe Barcelona, duke ofruar një vështrim më të afërt mbi punën që qëndron pas albumit.
Projekti është tashmë i disponueshëm në YouTube, ku mund të ndiqet nga fansat dhe të gjithë të interesuarit për të njohur më nga afër këtë etapë të rëndësishme të karrierës së artistes.
Në fjalën e saj përmbyllëse, Tayna shprehu mirënjohjen për mbështetjen që ka marrë ndër vite, duke e cilësuar këtë përvjetor si një pikënisje për synime dhe projekte të reja në të ardhmen.
Lini një Përgjigje