FLASH
Shkruar nga Pamfleti
Qeveria Britanike ka marrë një qëndrim të fortë ndaj platformës së medias sociale X, në pronësi të Elon Musk, pas shpërndarjes së imazheve seksuale të krijuara nga Inteligjenca Artificiale, përfshirë përmbajtje që paraqet gra dhe fëmijë.
Sipas zyrtarëve britanikë, këto imazhe janë prodhuar përmes mjetit të integruar të inteligjencës artificiale, Grok, dhe konsiderohen jo vetëm të papërshtatshme, por potencialisht të paligjshme sipas legjislacionit për sigurinë online në Mbretërinë e Bashkuar.
Në fillim të muajit janar, Ofcom, rregullatori i komunikimit në Mbretërinë e Bashkuar, ka hapur një hetim formal ndaj platformës X për të vlerësuar nëse rrjeti social ka shkelur ligjin, i cili kërkon nga platforma që të mbrojë përdoruesit nga përmbajtja e paligjshme, duke përfshirë imazhet seksuale të fëmijëve dhe materialet intime jo konsensuale.
Autoritetet britanike kanë dënuar përdorimin e mjeteve të Inteligjencës Artificiale për të manipuluar foto njerëzish në mënyrë seksuale dhe kanë paralajmëruar se, nëse X nuk ndërmerr masa efektive për të parandaluar këtë përmbajtje, mund të përballet me sanksione që variojnë nga gjobat e mëdha deri te bllokimi i platformës në Mbretërinë e Bashkuar.
Nga ana e saj, X ka tentuar të kontrollojë situatën duke kufizuar funksionin e gjenerimit të imazheve vetëm për abonentët që paguajnë. Ndërkohë, Elon Musk ka reaguar ashpër, duke akuzuar qeverinë britanike për tentativë censurimi dhe duke e cilësuar atë “fashiste”.
Rasti nënvizon shqetësimet globale mbi sigurinë e përdoruesve dhe mungesën e mbrojtjes për fëmijët ndaj imazheve të dëmshme të krijuara nga inteligjenca artificiale.
Lini një Përgjigje