FLASH
Shkruar nga Pamfleti
Aktori i njohur turk Can Yaman është njoftuar zyrtarisht si bashkëprezantues i Festivalit të Sanremos 2026, eventit më të rëndësishëm muzikor në Itali, ku tradicionalisht përzgjidhet edhe përfaqësuesi i vendit për Eurovision 2026.
Sipas njoftimit të publikuar nga RAI, Yaman do të ngjitet në skenë në natën e parë të festivalit, më 24 shkurt, përkrah prezantuesit kryesor Carlo Conti dhe këngëtares me famë botërore Laura Pausini. Ky angazhim shënon një rikthim të fortë mediatik për aktorin, vetëm pak kohë pas polemikave që e shoqëruan.
Festivali i Sanremos 2026 do të zhvillohet nga 24 deri më 28 shkurt, me pjesëmarrjen e 30 artistëve në konkurrim. Mes emrave të njohur janë Ermal Meta, me këngën “Stella stellina”, i cili përfaqësoi Italinë në Eurovision 2018 së bashku me Fabrizio Moro, si dhe Raf, me këngën “Ora e per sempre”, i cili mori pjesë në Eurovision 1987 me Umberto Tozzi.
Ashtu si në edicionet e mëparshme, fituesi i Festivalit të Sanremos do të fitojë të drejtën për të përfaqësuar Italinë në Eurovision 2026. Në rast refuzimi, kjo e drejtë do t’i kalojë artistit të renditur i dyti dhe më pas sipas klasifikimit përfundimtar.
Sa i përket formulës së festivalit, nata e parë do të përfshijë performancat e të gjithë artistëve, të vlerësuara nga dhoma e shtypit. Nata e dytë dhe e tretë do të ndahen sipas pjesëmarrësve, me vota nga komitetet e radios dhe publiku. Nata e katërt do t’i kushtohet këngëve “cover”, pa ndikuar në renditjen finale, ndërsa nata e pestë dhe përmbyllëse do të vendosë fituesin përmes një kombinimi të televotimit, shtypit dhe radios.
Pjesëmarrja e Can Yaman në rolin e bashkëprezantuesit pritet të sjellë vëmendje të madhe mediatike për Sanremo 2026, duke e vendosur festivalin jo vetëm në qendër të muzikës italiane, por edhe të debatit publik.
Can Yaman ishte në qendër të vëmendjes muajin e kaluar, kur u arrestua nën akuza që lidhen me drogën dhe prostitucionin. Megjithatë, pas hetimeve, ai u lirua, ndërsa çështja nuk përfundoi me masa ndëshkuese, duke i hapur rrugë vazhdimit të karrierës së tij artistike.
Lini një Përgjigje