FLASH
Shkruar nga Pamfleti
Shaip Kamberi, përfaqësues i shqiptarëve të Luginës së Preshevës në Kuvendin e Serbisë, ka reaguar lidhur me kandidaturën e Demo Berishës për postin e ministrit për të Drejtat e Njeriut, Pakicave dhe Dialogun Social. Kamberi shprehet se kandidatura e Berishës është “politikisht e papranueshme dhe moralisht e turpshme”.
Kamberi në llogarinë e tij në rrjetin social shkruan se ishte “goditje e rëndë për çdo shqiptar që vuajti, rezistoi dhe sakrifikoi për të drejtat e tij në Serbi”.
“Ai emërim është jo vetëm i papranueshëm politikisht, por edhe moralisht i turpshëm, sepse Berisha nuk është përfaqësues i të drejtave të njeriut, por simbol i mohimit të identitetit kombëtar dhe politik të shqiptarëve të Kosovës dhe të Luginës së Preshevës”, ka thënë Kamberi.
Sipas tij, bëhet fjalë për një ish-oficer të ushtrisë serbe, pjesë e strukturave që janë përfshirë në krimet e luftës në Kosovë.
Kamberi konsideron se emërimi nuk duhet të kalojë pa reagim nga shqiptarët e Dolinës, institucionet në Prishtinë dhe Tiranën zyrtare.
Heshtja për këtë absurditet është bashkëpunim, tha Kamberi.
Lini një Përgjigje