FLASH
Shkruar nga Pamfleti
Tubimi më i madh i javës u mbyll pa incidente, ndërsa mijëra qytetarë dërguan një mesazh të fortë kundër establishmentit politik që ka dominuar vendin për dekada.
Pas afro katër orësh protestë të pandërprerë, është mbyllur tubimi i zhvilluar para Kryeministrisë, i cili shënoi kulmin e një jave mobilizimi qytetar në Tiranë dhe në disa qytete të vendit. Mijëra qytetarë mbushën bulevardin përballë godinës së qeverisë, ndërsa në fund të protestës turma nisi të largohej drejt Sheshit Skënderbej.
Ndryshe nga ditët e mëparshme, organizatorët bënë thirrje që pas përfundimit të tubimit të mos kishte bllokime rrugësh apo përplasje me forcat e rendit, duke kërkuar që protesta të mbyllej në mënyrë paqësore. Thirrja u respektua nga pjesëmarrësit, të cilët u shpërndanë gradualisht pas përfundimit të fjalimeve.
Por nëse protesta u mbyll pa tensione, mesazhi i saj ishte ndër më të fortët e artikuluar deri tani. Përgjatë katër orëve, në shesh nuk u dëgjuan vetëm thirrje kundër qeverisë së Edi Ramës. Në pankarta dhe brohoritje dominuan edhe mesazhe kundër opozitës tradicionale dhe figurave që kanë dominuar jetën politike shqiptare prej dekadash.
“Rama ik”, “Rama në burg, Berisha në burg”, “Dorëheqje” dhe “Shqipëria nuk shitet” ishin disa nga sloganet që shoqëruan protestën deri në momentet e fundit të saj.
Kjo është edhe arsyeja pse shumë pjesëmarrës e konsiderojnë lëvizjen si diçka më të madhe sesa një protestë e zakonshme. Ajo që nisi si reagim qytetar është shndërruar në një revoltë kundër një sistemi politik që, sipas protestuesve, ka prodhuar korrupsion, emigrim, varfëri dhe mungesë shprese për brezat e rinj.
Një nga elementët më domethënës të tubimit ishte fakti se pjesëmarrja nuk ra me kalimin e orëve. Përkundrazi, qytetarë të rinj vazhduan t'i bashkoheshin protestës edhe gjatë zhvillimit të saj, ndërsa mbështetje pati edhe në qytete të tjera të vendit dhe nga diaspora shqiptare në Europë.
Pas shtatë ditësh protestash, mesazhi që doli nga bulevardi ishte i qartë: një pjesë e madhe e qytetarëve nuk kërkon vetëm ndryshimin e një qeverie, por ndryshimin e një modeli politik që ka dominuar Shqipërinë për më shumë se tre dekada. Dhe pikërisht ky është mesazhi që u përcoll nga protesta e së shtunës: pakënaqësia nuk drejtohet më vetëm ndaj një partie apo një lideri, por ndaj gjithë establishmentit politik që ka qeverisur vendin në tranzicion.
Teksa sheshi u zbraz dhe protestuesit u larguan në mënyrë paqësore, mbeti pas mesazhi më i fortë i javës: Shqipëria kërkon ndryshim. Nesër revolucioni vijon...
Super proteste per tu pershendetur. Per mesazhet, per qytetarine, per sjelljen, per vendosmerine, per energjine. Kryeministri kete sjellje e merr per dobesi, ben si i forte. Por kur te shperthej revolta dhe zemerimi do ti vijne ne Surrel. Atehere do ndergjegjsohet por do jete shume vone. Mos degjoj oligarket qe ka rreth e qark, kriminelet qe ka prane, pushtetaret lepires qe ka afer, por ta lexoj mesazhin e kesaj levizjeje. Tanime eshte direkte per te, me emer.
Rinia ka kurajo, zemër, mençuri për të ndryshuar sistemin e pajtuar të komunistëve. Çështja është të qëndrojnë të bashkuar, të gjejnë pikat e përbashkëta dhe të krijojnë platformë të re për Shqipërinë e Re e të luftojnë për të. Baballarët e tyre janë shkaktarët e kësaj gjëndje. Ata nuk duhen lejuar të bëhen përsëri pjesë e zgjidhjes. E vështirë. Shpresojmë, por jo e pamundur.