FLASH
Shkruar nga Pamfleti
Teksa protesta hyn në ditën e 25-të dhe kritikat nga mediat pranë Erdoganit janë shtuar, kryeministri duket se po forcon kontaktet me aleatët e tij ndërkombëtarë...
Shqipëria po hyn në ditën e 25-t të protestës qytetare, ndërsa presioni ndaj qeverisë duket se po rritet nga dita në ditë. Në këtë klimë tensioni politik, Edi Rama po shfaqet gjithnjë e më aktiv në frontin diplomatik.
Vetëm një ditë më parë, kryeministri udhëtoi drejt Francës, ku zhvilloi një takim me presidentin Emmanuel Macron. Vizita u interpretua si një përpjekje për të treguar se mbështetja ndërkombëtare ndaj tij mbetet e fortë, pavarësisht krizës së brendshme dhe protestave që prej javësh po mbushin rrugët e Tiranës.
Por lëvizjet diplomatike nuk u ndalën me kaq.
Sot, Rama priti në një vizitë kortezie ambasadorin e ri të Turqisë në Tiranë, B. Ceyhun Erciyes. Sipas njoftimit zyrtar të ambasadës turke, gjatë takimit u vlerësua niveli i shkëlqyer i marrëdhënieve mes dy vendeve dhe u riafirmua vullneti për thellimin e mëtejshëm të bashkëpunimit, veçanërisht në fushën ekonomike.
Ambasadori Erciyes shprehu gjithashtu kënaqësinë për vizitën e ardhshme të Ramës në Ankara me rastin e Samitit të NATO-s.
Në dukje bëhet fjalë për një takim rutinë diplomatik. Por koha kur zhvillohet ai e bën më interesant.
Për vite me radhë, Recep Tayyip Erdogan ka qenë një nga aleatët më të rëndësishëm ndërkombëtarë të Edi Ramës. Sa herë kryeministri shqiptar është përballur me vështirësi politike, ekonomike apo diplomatike, marrëdhënia me Ankaranë ka qenë një nga pikat e tij më të forta të mbështetjes.
Por javët e fundit diçka duket se ka ndryshuar.
Mediat pranë qeverisë turke kanë shtuar ndjeshëm kritikat ndaj Ramës. Fillimisht raportuan gjerësisht protestat në Shqipëri. Më pas erdhën artikujt për projektet e Jared Kushner në Sazan dhe Zvërnec. Dhe kulmi u arrit me analizën e gazetës së madhe turke “Daily Sabah”, e cila e lidhi drejtpërdrejt pakënaqësinë në Shqipëri me afrimin e Ramës me Izraelin.
Në atë analizë, vizita e Ramës në Knesset dhe deklaratat e tij në mbështetje të Izraelit u vendosën në qendër të kritikave. Gazeta sugjeronte se rreshtimi gjithnjë e më i fortë i Tiranës pranë Tel Avivit nuk është parë me sy të mirë në Ankara, sidomos në një moment kur marrëdhëniet mes Turqisë dhe Izraelit ndodhen në një nga pikat më të ulëta të viteve të fundit.
Pikërisht për këtë arsye, takimi i sotëm me ambasadorin e ri turk merr një domethënie më të gjerë politike.
Në një kohë kur protestat vazhdojnë, ndërsa mediat turke po tregohen shumë më kritike se më parë ndaj tij, Rama duket se po përpiqet të ruajë ekuilibrat me dy nga partnerët e tij më të rëndësishëm ndërkombëtarë: Macron në Perëndim dhe Erdoganin në Lindje.
Nëse takimi me presidentin francez u lexua si një sinjal drejt Brukselit dhe Parisit, pritja e ambasadorit turk duket si një kujtesë se lidhjet me Ankaranë mbeten ende një pjesë e rëndësishme e strategjisë së tij politike.
Dhe ndërsa protestuesit vijojnë të kërkojnë largimin e tij për të 25-tën ditë me radhë, kryeministri duket se po kërkon mbështetje jo vetëm brenda vendit, por edhe te aleatët e tij jashtë kufijve. /Pamfleti
Toptani po kerkon ndihme qe te shpetoj nga shqiptaret. Historia u personit sepse ne shqiptaret nuk mesuame si duhet.
Sulltan ska nevoj per shpëtimtar, tani qe ka Sara Milon dhe Zegjine Çaushin,