FLASH
Shkruar nga Pamfleti
Mazhorancës i firojnë sërish votat në seancë...
Tom Doshi duket se është kthyer në patericë të Edi Ramës në Kuvend. Edhe pse u shanë dhe u përplasën para zgjedhjeve, Rama dhe Toma janë “miq” të pandarë. Ashtu siç ndodhi në seancën e kaluar, edhe në seancën e sotme, mazhoranca ka kaluar ligjet e rendit të ditës falë 2 votave të PSD.
Parlamenti kaloi me 72 vota pro projektligjin e dorëzuar nga Ministria e Infrastrukturës dhe Energjisë dhe i paraqitur si nismëtar nga ministri Taulant Balla, për performancën energjitike në ndërtesa. Ai u kalua falë ndihmës së dy deputetëve të PSD, Gledis Çeliku dhe Gertjan Deda, si dhe të deputetit të PDIU, Nusret Avdulla.
Ndërkohë i pranishëm në seancë ishte dhe deputeti demokrat Dashnor Sula, i cili votoi kundër.
E njëjta situatë ndodhi dhe në seancën e 5 qershorit, ku sërish PS nuk siguroi votat e nevojshme dhe u ndihmua nga PSD.
Ajo që bie në sy është se shumë deputetë kanë filluar të mos shkojnë si në seanca, ashtu dhe në komisionet parlamentare. Dy deputetët e PS që mungonin sot ishin Tatjana Piro dhe Arben Pëllumbi, të cilët nuk do të jenë deputetë në shtator. Madje dhe seanca nisi me vonesë për shkak të mugesës së kuorumit.
Para zgjedhjeve pati një përplasje të fortë mes Doshit dhe Ramës. Kreu i PSD e sulmoi disa herë mazhorancën, duke folur për lidhje me krimin dhe korrupsionin. Por pas zgjedhjeve duket se e uli kokën.
Si duket Rama dhe Doshi bëjnë “shou politik” sa herë u prishen interesat. Doshi kërkonte vëmendje para zgjedhjeve ose ndonjë “kockë” më shumë; tani që PS ka shumicën, ai ka “ulur kokën” dhe ndjek Ramën, me shpresën se do t’i kërkohet ndihma kur të duhen 84 vota. /Pamfleti
Lini një Përgjigje