FLASH
Shkruar nga Pamfleti
Ministri i Mbrojtjes Niko Peleshi, konfirmoi sot pas mbledhjes së qeverisë se Shqipëria synon të riaktivizojë përmes investimeve zhvillimin e industrive të reja ushtarake në plotësim edhe të kërkesave në rritje të tregut botëror
Duke folur mbi industrinë ushtarake, Peleshi u shpreh se për fat të keq ka një kërkesë të madhe në tregun botëror për municione e armatim. Shqipëria, sipas tij, është nga vendet e pakta në rajon dhe Europë që nuk e ka të zhvilluar, por e ka të fjetur industrinë e vetë të dikurshme ushtarake.
“Natyrisht ka nevojë për investime, për investitorë, nuk mund të zhvillohet kjo sipërmarrje private nga shteti, apo nga ish-ndërmarrjet shtetërore. Ndërmarrjet shtetërore tani ne i kemi në proces transformimi në shoqëri aksionere, të paktën në sektorin e sigurisë dhe mbrojtjes”, tha Peleshi.
Ministri theksoi se është i hapur dhe në pritje të ofertave dhe interesimeve që nuk mungojnë nga aktorë të ndryshëm ndërkombëtarë por sipërmarrje vendase.
“Synojmë ta riaktivizojmë përmes investimeve dhe ta vëmë në punë sektorin, për të zhvilluar industri të reja ushtarake në plotësim edhe të kërkesave në rritje të tregut, për fat të keq për shkak të konflikteve që sa vijnë edhe shtohen”, tha ai.
Ministri u shpreh se aktualisht kemi Poliçanin, uzinën e lëndëve plasëse të Mjekësit dhe kombinatin e Gramshit.
“Poliçani s’ka fare aktivitet, dy tjerat kanë pak aktivitet, që lidhet me demontimin dhe sigurojnë disa të ardhura për të mbajtur veten e vet. Nuk kanë detyrime si në rastin e Poliçanit”, tha Peleshi.
Ministri konfirmoi se ka pasur veçanërisht interes për industrinë tonë ushtarake nga investitorë të huaj që kanë parë potencialin e tyre. Po ashtu qeveria miratoi një p/ligj përmes të cilit paguan nga buxheti i shtetit, pagat dhe sigurimet shoqërore të prapambetura për mbi 120 ish-punonjës të kombinatit të Poliçanit. Nëse miratohet nga Parlamenti, kosto në buxhet do të jetë mbi 83 milionë lekë.
“Vitin e kaluar ne synuam ta qasim në mënyrë më profesionale duke bërë një vlerësim me Agjencinë e Prokurimeve të NATO-s me qendër në Luksemburg. Bëmë një raport vlerësimi që të dimë më mirë se sa investime do të duhen dhe si janë projeksionet e tregut. Tani jemi më të qartë për të investuar. Kryeministri e ka thënë shumë qartë. Ne duam të ndryshojmë qasjen nga ‘Shqipëria 1 euro’, te Shqipëria partnere në çdo investim të përbashkët qoftë me investitorë të huaj, apo vendas. Këtë u prezantojmë edhe investitorëve potencialë, që tani janë në fazën e shprehjes së interesit dhe inspektimit të këtyre industrive. Ka disa të tillë”, tha Peleshi.
Propozimin për të prodhuar armë dhe municione e bëri nga Tirana edhe presidenti i Ukrainës Volodymyr Zelensky gjatë vizitës së tij më 29 shkurt. Ndërsa vetë kryeministri Edi Rama teksa ka folur për rilindjen e industrisë ushtarake ka shprehur ambicien që brenda vitit 2030 Shqipëria të mund të kryejë eksporte ushtarake të markës “Made in Albania”.
Lini një Përgjigje