FLASH
Shkruar nga Pamfleti
Një zëdhënës i kryeministrit Rishi Sunak ka reaguar pas deklaratave te forta të Edi Ramës në Britani për çështjen e emigrantëve. Britania ka bërë të qartë që do të ndalojë që gjithë ata që përpiqen të kalojnë ilegalisht ‘La Manshin’. Kryeministri Rama do të takohet sot me homologun britanik Rishi Sunak. Rama në një intervistë për “Today” të BBC Radio 4 dënoi retorikën e përdorur nga politikanët e vendit ndaj emigrantëve shqiptarë në Britani.
I pyetur nëse po kritikonte mënyrën sesi politikanët britanikë i kanë përshkruar emigrantët shqiptarë që shkojnë në Britani përmes La Manshit, apo stereotipizimin e shqiptarëve, Rama u përgjigj: “Të dyja janë të vërteta.”
Po ashtu, Rama kërkoi nga britanikët që të mos lejojnë që “disa mollë të kalbura” t’i japin formë perceptimit të tyre për shqiptarët.
“Ashtu si Britania nuk është James Bond apo Mr. Bean, edhe nuk jemi vetëm “Taken”, u shpreh Rama duke iu referuar filmit të Liam Neeson ku shqiptarët portretizohen si trafikantë të qenieve njerëzore.
“Mendoj se do të vazhdojmë qartësisht të sigurohemi që të bisedojmë për këtë në një mënyrë të faktuar, të drejtë dhe të ndjeshme. Dhe ky është toni që keni dëgjuar nga Kryeministri (Rishi Sunak) për këtë çështje. Para së gjithash ne kërkojmë që të ndalojmë njerëzit e pambrojtur që të ndërmarrin udhëtime të rrezikshme në të cilat kemi parë njerëz të humbin jetët e tyre. Ne e vlerësojmë komunitetin shqiptar në Mbretërinë e Bashkuar dhe mirëpresim çdo shqiptar që udhëton në Mbretërinë e Bashkuar ligjërisht dhe kontribuon në shoqërinë tonë. Sidoqoftë realiteti është që po shohim një numër të lartë shqiptarësh që po rrezikojnë jetën e tyre për të ndërmarrë udhëtime të paligjshme dhe të rrezikshme në Mbretërinë e Bashkuar dhe kjo vendos nën presion sistemin e azilit”, tha zëdhënësi për mediat britanike.
Zëdhënësi shtoi se Sunak po pret me padurim “diskutime konstruktive” me Ramën rreth emigracionit të paligjshëm këtë pasdite.
Kujtojmë se deklaratat e Suella Braverman në tetor të vitit të shkuar shkaktuan përplasje diplomatike mes dy vendeve pasi, gjatë një fjalimi në Parlament, ajo foli “për kriminelë shqiptarë që po lejohen të futen në Britani.”
“Gjakrat” mes dy vendeve u qetësuan pas nënshkrimit të një marrëveshjeje dypalëshe mes Ramës dhe homologut Sunak në dhjetor, me anë të së cilës synohet trajtimi i emigracionit të paligjshëm në Britaninë e Madhe.
Lini një Përgjigje