FLASH
Shkruar nga Pamfleti
Nënkryetarja e Partisë Demokratike, Oriola Pampuri ka reaguar pas qëndrimet të drejtorit të Policisë Tiranë Tonin Vocaj mbi skandalin ku burri i ministres Delina Ibrahimaj goditi drejtorin e Agjencisë së Trajtimit të Kredive.
Pampuri tha përgjigjia e Vocajt se ngjarja nuk u publikua pasi nuk futej në ngjarjet sensitive është e rëndë.
Sipas saj, kjo tregon se ligji nuk është i barabartë për të gjithë.
"Përgjigjia e kryepolicit të Tiranës lidhur me rastin e bashkëshortit të ministres Ibrahimaj është i rëndë dhe vërteton pikërisht akuzën e PD që ligji në këtë vend nuk është i barabartë për të gjithë. Problemi i mospasqyrimit të lajmit nuk ka të bëjë me sensacionin, por me mbajtjen fshehur të ngjarjes pikërisht se i akuzuari ishte burri i ministres së qeverisë Rama.
Ajo që e bën edhe më të rëndë është deklarata se ishte e pamundur shoqërimi dhe arrestimi i bashkëshortit të ministres, por materialet iu referuan prokurorisë. A është kjo e njëjta procedurë edhe për njerëzit e zakonshëm? Përse e kishte të vështirë policia e shtetit për ta shoqëruar dhe për ta proceduar bashkëshortin e ministres Ibrahimaj?
Në cilën shtëpi u fsheh ai që policia nuk e gjeti dot dhe nuk arriti ta procedojë? Nëse një shqiptar i zakonshëm do të bënte një goditje për shkak të detyrës apo plagosje me thikë, a do të ishte e njëjtë sjellja e policisë së shtetit?
Në qeverisjen e Edi Ramës shqiptarët nuk janë të barabartë! Ka disa që arrestohen për gjëra të vogla dhe të tjerë që "tolerohen" për gjëra të mëdha! Kjo është pabarazi!
Rasti i burrit të ministres Ibrahimaj është pikërisht ky! Prandaj PD zotohet për barazi përpara ligjit për të gjithë! Vetëm kështu Shqipëria do të jetë e jetueshme për njerëzit", tha Pampuri.
Lini një Përgjigje