FLASH
Shkruar nga Pamfleti
Akademiku Artan Fuga e konsideron riformatimin e fundit të qeverisë si një vendim të ndikuar nga presioni i brendshëm dhe ai ndërkombëtar, në funksion të ruajtjes së kursit europian të vendit.
Ai analizon zëvendësimin e Belinda Ballukut me Albana Koçiun dhe ndryshimet e tjera në kabinet si një përpjekje për të adresuar kërkesa të artikuluara prej kohësh, përfshirë ato që lidhen me hetimet e SPAK. Sipas tij, kryeministri ka ndërmarrë një hap që synon të japë sinjal ndryshimi në nivel qeverisës.
“Mua më duket që dje Rama i dha një zgjidhje asaj që kërkohej prej kohësh nga SPAK. Pra, një përpjekje për t’u tërhequr në atë mënyrë që nga jashtë të konsiderohej si një ndryshim për gjithë qeverinë?”, thotë Fuga.
Kryeministri ka vendosur edhe në presionin e ndërkombëtarëve, të cilët kërkuan marrjen e përgjegjësive personale, thekson Fuga, i cili i quan ndryshimet e emrave në qeveri pa ndikim në procesin e anëtarësimit.
“Lëvizja e ministrave që kanë 2-3 muaj që janë emëruar, çka do të thotë që nuk kanë autonomi e kjo ndodh në model qeverisje piramidale. Çështja e integrimit nuk është çështje ministri. Por kemi çështje që ka të bëjë me gjendjen e të drejtave të njeriut, drejtësisë, korrupsionit”, shton akademiku.
Integrimi për profesor Fugën është gjeopolitik, por lëvizjet e fundit të Kryeministrit Edi Rama me pranimin e ftesës së Donald Trump kanë shkaktuar edhe një krisje me BE: “Mos harrojmë, pjesëmarrjen e Shqipërisë në bordin e paqes. Por një e carë midis Shqipërisë dhe BE është krijuar, sepse politika e jashtme europiane nuk është paraqitur”.
Në këto rrethana, analizohet më tej se shoqëria shqiptare po përballet me një krizë pasigurie mbi të ardhmen.
“Shumë aspekte të shoqërisë kanë mbetur pezull: Marrëdhënia midis drejtësisë dhe pushtetit, marrëdhënia midis opozitës dhe pushtetit, Shqipërisë dhe BE apo SHBA. Njeriu në jetën e përditshme thotë e kam problemin e zgjidha. Në jetën shoqërore nuk funksionon kështu, nuk zgjidhet me shkop magjik. Dhe sa kohë klasa politike nuk e vë gishtin se cilat janë problemet reale, por merret me propagandën, problemet do të vazhdojnë”, shprehet Fuga për Top Channel.
Fuga kritikon edhe strategjinë e opozitës, që pa pasur numrat e deputetëve në Parlament për të ushtruar presionin ndaj qeverisë, po gabon në mënyrën e kërkimit të llogaridhënies: “E di historia, shkenca politike në momentin kur pesha politike në Parlament nuk luan rol, ajo paguan një lloj bjerrje të mbështetjes që ka në opinionin publik. Ka një lloj dyshimi, mosbesimi edhe për faktin se shumë figura të opozitës janë të ezauruara. Atëherë radikalizohen në lëvizje në rrugë. Ku flitet për revoltë paqësore e mbaron me shishe benzinë të hedhura. Efekti është zero!”.
Lini një Përgjigje