FLASH
Shkruar nga Pamfleti
Presidenti i PL-së, Ilir Meta, në një audio-mesazh nga qelia, ku ndodhet prej disa muajsh me vendim të GJKKO-së, ndërsa garon për deputet në listën e hapur të koalicionit ‘Aleanca Shqipëria Madhështore’ në zgjedhjet e 11 majit, ka ftuar qytetarët që të ndëshkojnë me votë Edi Ramën, duke i dhënë fund shpopullit të vendit.
Meta i bën thirrje qytetarëve që të marrin pjesë masivisht në zgjedhje.
“Pjesëmarrje dhe vetëm pjesëmarrje për t’i hapur rrugën ndryshimit dhe madhështimit të Shqipërisë tonë të shtrenjtë!
Jam i bindur se edhe socialistët atdhetarë dhe të përgjegjshëm do të jenë një forcë e rëndësishme ndëshkuese dhe ndryshuese për Shqipërinë më 11 Maj sepse nuk ka asgjë socialiste ta lesh shtetin në dorën e krimit dhe të heshtësh e të varfërosh intelektualët, pedagogët, akademikët, mësuesit, mjekët.
Sepse nuk ka asgjë socialiste të degjenerosh familjen dhe fjalët e shënjta nënë e babë t’i zëvendësosh me “Prindi 1 dhe Prindi 2” të “Rilindjes”.
Sepse nuk ka asgjë socialiste që 570 mijë pensionistë t’i braktisësh me pension 50-170 euro/muaj ndërsa qindra milion euro t’i grabisësh me inceneratorë që nuk ekzistojnë”, shprehet Meta.
Në vijim ai thekson se “dua t’i garantoj të gjithë socialistët e ndershëm se vota e tyre për Ilir Metaj në Qarkun e Tiranës dhe për kandidatët e Partisë së Lirisë në çdo Qark të Shqipërisë është garanci sublime për mbajtjen e premtimeve tona konkrete që 100 ditët e para të koalicionit tonë për çdo pensionist dhe student, për çdo përfitues të ndihmës ekonomike dhe qytetar shqiptar në nevojë”.
“Siç është garanci që brenda 4 viteve Shqipëria bëhet fuqi prodhuese dhe eksportuese.
Çdo anëtari dhe simpatizanti të Partisë së Lirisë në këto 48 orë të mbetura i kërkoj që të shtojë edhe një të afërm tjetër edhe një shok edhe një komshi edhe një të njohur për ta bërë pjesë të Ndryshimit historik të 11 Majit.
Të braktisim mashtrimin! Të braktisim ndryshimin dhe shpopullimin! Të zgjedhim Ndryshimin, NR.1, që Shqipëria dhe shqiptarët të jenë gjithmonë Të Parët!”, shprehet Meta.
Lini një Përgjigje