FLASH
Shkruar nga Pamfleti
I frymëzuar nga vështrimi i një vajze të vogël nga Gaza dhe nga një ninullë që i këndon së bijës, Ermal Meta u ngjit në skenën e Festivalit të Sanremo-s 2026 me baladën “Stella Stellina”, duke sjellë një nga momentet më emocionuese të mbrëmjes së parë.
Kënga vjen si një dedikim për një vajzë të vrarë në Gaza, por mesazhi i saj shkon përtej një historie të vetme. Përmes vargjeve të ndjera, artisti i jep zë të gjitha viktimave të pafajshme të konfliktit në Palestinë, duke e kthyer skenën e Sanremos në një hapësirë reflektimi dhe ndërgjegjësimi.
Një element simbolik që tërhoqi vëmendjen ishte emri “Amal” i qëndisur në jakën e këmishës së tij. Më shumë sesa një identitet i veçantë, “Amal” u perceptua si një figurë përfaqësuese e fëmijëve të prekur nga lufta. Në rrjetet sociale, Meta sqaroi se protagonistja e “Stella Stellina” është “një vajzë pa emër, por ndoshta me të gjithë emrat”, duke përmendur Aysha, Amal, Layla, Nour, Hind, emra që simbolizojnë vajza që mund të jenë “bija të askujt dhe njëkohësisht bija të të gjithëve”.
Kjo paraqitje konfirmon edhe një herë prirjen e Metës për të trajtuar tema sociale të ndjeshme. Në të kaluarën, ai ka prekur plagë të thella me “Vietato morire”, kushtuar dhunës në familje, si dhe me “Non mi avete fatto niente”, kënga me të cilën triumfoi në edicionin 2018 të festivalit përkrah Fabrizio Moro.
Edicioni i 76-të i festivalit u çel në skenën e Teatro Ariston, nën prezantimin e Carlo Conti dhe Laura Pausini, duke sjellë një atmosferë festive, por edhe momente me peshë emocionale. Mbrëmja nisi me një homazh për Pippo Baudo, figurë historike e festivalit, si dhe me një përshëndetje për dirigjentin Peppe Vessicchio.
Një tjetër kulm i natës ishte performanca e të ftuarit special Tiziano Ferro, i cili festoi 25-vjetorin e hitit “Perdono” me një përzierje këngësh që elektrizoi publikun në sallë.
Sa i përket klasifikimit provizor pas natës së parë, surpriza nuk mungoi: në podium u renditën tre gra. Në Top 5 u përfshinë Arisa, Fulminacci, Serena Brancale, Ditonellapiaga, si dhe dyshja Fedez & Marco Masini.
Megjithatë, përtej renditjes dhe garës, ajo që mbeti në kujtesë ishte momenti kur një emër i vetëm, “Amal”, u kthye në simbol dhimbjeje, por edhe shprese, në një nga skenat më të mëdha të muzikës italiane.
Bravo bravo bravo dhe vetëm bravo që përmëndët fëmijët e pa fajshëm.
Kënga "Stella Stellina" e Ermal Metës e kënduar në Sanremo 2026 me shumë gjasë është plagjiaturë e këngës "Allo" nga Balti. _______________ https://m.youtube.com/watch?v=22lBZpuyZxA