FLASH
Shkruar nga Pamfleti
Një 21-vjeçar është shpallur në kërkim në Lushnje, pasi Policia zbuloi një armë zjarri në xhupin e tij, gjatë një ndërhyrjeje në një lokal të qytetit.
Sipas të dhënave, shërbimet e Policisë ndërhynë në një bar-kafe në lagjen “Xhevdet Nepravishta”, ku dyshohej për praninë e një personi të armatosur. Gjatë kontrollit, në xhepin e një xhupi të lënë mbi një karrige në tavolinën ku ndodheshin pesë të rinj, u gjet një pistoletë me municion luftarak.
Nga veprimet hetimore u bë i mundur identifikimi i poseduesit të xhupit dhe armës, shtetasi Marlind Sulo, 21 vjeç, banues në Lushnje, i cili ishte larguar pak minuta më herët drejt një berberhaneje, me qëllim kthimin sërish në lokal.
Ndërkohë, në pranga ranë: Eri Kasapi, 20 vjeç; Saviol Shehu, 24 vjeç; Gledion Mullaj, 21 vjeç; Helio Toli, 20 vjeç; dhe Lusian Sulo, 22 vjeç, të gjithë banues në Lushnje. Ata ndodheshin në të njëjtën tavolinë me 21-vjeçarin dhe nuk bashkëpunuan me autoritetet, duke mos treguar pronësinë e xhupit dhe armës, çka konsiderohet pengim i veprimeve të Policisë.
Gjatë kontrollit në banesën e Marlind Sulos, u gjetën gjithashtu fishekë, duke forcuar dyshimet ndaj tij. Gjithashtu u sekuestruan arma e zjarrit tip pistoletë, municion luftarak, një automjet dhe pesë aparate celularë.
"Sekuestrohen një armë zjarri tip pistoletë, municion luftarak, 1 automjet dhe 5 celularë. Shërbimet e Komisariatit të Policisë Lushnjë, në vijim të punës për goditjen e veprimtarisë kriminale të armëmbajtjes pa leje dhe bazuar në informacionet e siguruara në rrugë operative se një shtetas lëvizte me armë zjarri në qytet, dhe se ndodhej në një lokal bashkë me disa shokë të tij, organizuan punën për identifikimin dhe kapjen e tij. Shërbimet e Policisë kanë lokalizuar lokalin, një bar-kafeje në lagjen “Xhevdet Nepravishta”, ku dyshohej se ndodhej shtetasi i armatosur dhe kanë ndërhyrë për arrestimin tij. Gjatë ndërhyrjes shërbimet e Policisë kanë gjetur në xhepin e një xhupi, që ishte lënë në nga karriget e tavolinës ku ndodheshin 5 të rinjtë, një armë zjarri pistoletë me municion luftarak.
Në vijim të veprimeve u bë e mundur identifikimi i personit që posedonte xhupin dhe armën e zjarrit , konkretisht shtetasi M. S., 21 vjeç, banues në Lushnjë, i cili ishte larguar pak minuta më parë për në një berberhane dhe do kthehej përsëri. Po në vijim të veprimeve u arrestuan shtetasit E. K., 20 vjeç, S. Sh., 24 vjeç, G. M., 21 vjeç, H. T., 20 vjeç dhe L. S., 22 vjeç, të gjithë banues në Lushnjë, të cilit ishin në një tavolinë me shtetasin M. S, dhe nuk treguan se kujt i përkiste xhupi dhe arma duke penguar Policinë në veprimet e saj. Po në vijim të veprimeve, gjatë kontrollit në banesën e shtetasit M. S , u gjet municion luftarak (fishekë).
Në cilësinë e provës materiale u sekuestruan arma e zjarrit tip pistoletë, municioni luftarak, 1 automjet dhe 5 aparate celularë. Vijon puna për kapjen e 21 vjeçarit. Materialet procedurale iu referuan Prokurorisë së Fierit për veprën penale “Moskallëzim i krimit”, në ngarkim të 5 shtetasve të arrestuar, si dhe “Mbajtja pa leje dhe prodhimi i armëve, armëve shpërthyese dhe municionit”, në ngarkim të shtetasit M. S., të shpallur në kërkim.", thuhet në njoftimin e policisë.
Lini një Përgjigje