FLASH
Shkruar nga Pamfleti
E gjithë kjo situatë duket se po e shndërron garën për bashkinë më të rëndësishme në vend në një farsë, ku çdo ditë, derisa Berisha të vendosë për emrin, me ose pa partitë e tjera të opozitës, do të ofrohen emra si kandidatë që kërkojnë mbështetje...
Në 6 bashki të vendit, përfshirë edhe Tiranën, si kryeqytet, zgjedhjet e pjesshme lokale do të mbahen më 9 nëntor. E gjithë vëmendja është përqendruar në kryeqytet, ku gara për pozicionin e Kryetarit të Bashkisë është më shumë politike sesa administrative.
Socialistët e Edi Ramës e mbyllën shpejt dilemën në lidhje me kandidatin, duke pranuar vendimin e Kryeministrit që në garë të jetë Ogerta Manastirliu, ish-ministrja e Arsimit, një bashkëpunëtore e gjatë e kreut të PS-së.
Me këtë propozim, socialistët e Ramës bënë të mundur që në garën për kryetar bashkie të Tiranës të përfshihet për herë të parë një grua, për të cilën Kryeministri nuk kursen lëvdata, por edhe bindjen se ajo do të jetë pasardhësja e Erion Veliajt.
Emri i dytë që është zyrtarizuar si kandidat është ai i Arlind Qorit, kreut të Lëvizjes Së Bashku, i cili do të synojë përsëri pozicionin e Kryetarit të Bashkisë, ashtu siç bëri dy vjet më parë. Qori është përjashtuar nga negociatat me PD-në, por gjithashtu ka deklaruar se nuk do të pranonte të hynte në bisedime me demokratët e Sali Berishës.
Topi tani është në fushën e opozitës, e cila duhet të nxjerrë një kandidat, pasi disa parti, në aleancë ose jo me PD-në, ranë dakord që një kandidaturë e pavarur duhet të futet në garën për Tiranën. Ky kusht i panegociueshëm i disa subjekteve të vogla, por me një numër të konsiderueshëm votash, duke iu referuar rezultateve të 11 majit, është pranuar edhe nga Sali Berisha.
Kreu i Partisë Demokratike tha se është i gatshëm të mbështesë një kandidat të pavarur, jo-partiak, megjithëse partia e tij ende nuk ka artikuluar një emër që mund ta vendosë në tryezën e diskutimit.
Dy nga emrat që janë ofruar si kandidatë të pavarur janë Ermal Hasimja dhe Florian Hackaj. Të dy emrat dolën si kandidatë pas konsultimeve që tre të mandatuarit nga Sali Berisha (Flamur Noka, Belind Këlliçi dhe Ilir Alimehmeti) zhvilluan me krerët e partive që janë në kampin opozitar ose shfaqen si të tillë në raport me Edi Ramën.
Pas deklaratës së Berishës se do të mbështeste një kandidaturë të pavarur me qëllim maksimizimin e votave të opozitës, në skenë dolën edhe dy emra të tjerë: aktori Florian Binaj dhe eksperti i qeverisjes vendore Agron Haxhimihali.
Një tjetër emër i hedhur në 'treg' është ai i analistit Fatos Lubonja, dikur një nga miqtë e ngushtë të Edi Ramës, sot një kritik i fortë i tij. Propozimi për kandidaturën e Lubonjës u paraqit nga Drejtori i Komunikimit i PD-së, Alfred Lela, përmes një shkrimi. Dhe po kështu një tjetër emër që qarkullon, por ende nuk ka asnjë reagim, është ai i Edlira Çepan, bashkëshortes së ish-deputetit të ndjerë të PD-së, Gerti Bogdani.
Pra, që nga momenti që Edi Rama e zyrtarizoi kandidaturën e Manastirliut për Bashkinë e Tiranës, në kampin tjetër, atë të opozitës, ka të paktën 5 emra 'të pavarur' që kërkojnë mbështetje, të propozuar ose të vetëshpallur si kandidatë.
Dhe lista mund të rritet me çdo orë që kalon, nëse PD-ja, si forca më e madhe opozitare, nuk del me një vendim të qartë se cilin kandidat mbështet. Deri më tani, ajo që është thënë zyrtarisht është se partia e udhëhequr nga Berisha do të mbështesë një të pavarur, emri i të cilit nuk dihet.
E gjithë kjo situatë duket se po e shndërron garën për bashkinë më të rëndësishme në vend në një farsë, ku çdo ditë, derisa Berisha të vendosë për emrin, me ose pa partitë e tjera të opozitës, do të ofrohen emra si kandidatë që kërkojnë mbështetje.
Nuk ka asgjë të keqe me individët që duan ose pretendojnë të hyjnë në një garë, madje edhe për kryetar bashkie. Përkundrazi, kjo tregon se shumë nga 'të pavarurit' janë të gatshëm të hyjnë në beteja politike, ndoshta edhe duke marrë rreziqe. Por mënyra se si po ndodh kjo në Tiranë mund t'i kthehet kundër opozitës, ku nga ideja e maksimizimit të votave përmes një emri të pavarur, ajo mund të humbasë edhe votat e mbështetësve të saj, për shkak të administrimit të të gjithë procesit deri në shpalljen e kandidatit. Të gjithë emrat e pavarur që ofrohen vetë ose propozohen, pas përzgjedhjes së emrit përfundimtar, nëse ka vetëm një, mund të fragmentojnë votat e opozitës, ndoshta aq sa të dalin me kandidatë të veçantë.
Dhe ndërsa zgjedhjet afrohen dhe kanë mbetur më pak se 30 ditë, duket se 3 negociatorët e PD-së do të nisin një raund tjetër takimesh me partitë opozitare për të folur për emra specifikë kandidatësh, nëse deri të shtunën, Berisha nuk ka vendosur se kë do të mbështesë ose asin që do të nxjerrë nga mëngë, përtej emrave që qarkullojnë. /Pamfleti/
Lini një Përgjigje