FLASH
Shkruar nga Emin Azemi
Përvoja ka treguar se pas çdo refuzimi të idesë për konsensualitet brendashqiptar, na është imponuar një kandidat (partiak) maqedonas, të cilin tërthorazi apo drejtpërdrejt e kemi zgjedhur edhe me votat tona.
Shqiptarëve të Maqedonisë iu nevojiten dy (2) opsione politike dhe një bashkërendim për disa tema të rëndësishme kombëtare (sepse shqiptarët ende nuk janë një komb shtet-formues në Maqedoni), në mënyrë që politikat e tyre të mos jenë zgjatime karikaturale të doktrinave djathtiste e majtiste maqedonase. Hapësirë për opozitarizëm të shpifur brenda shqiptarëve nuk ka, sepse ajo hapësirë duhet mbushur me idetë e parrumbullakosura të një zgjimi kombëtar dhe një kundërvënie intelektuale doktrinave maqedonase të cilat ende shkëlqimin e tyre e masin me errësirën e sinkopave shqiptare.
Bilanci i zgjedhjeve presidenciale (rrethi i parë), dëshmoi se shqiptarët janë në udhë të mbarë të konsolidojnë veprimin e tyre politik brenda dy opsioneve, me kusht që opozita në të ardhmen të ketë vetëm një lider, i cili do të zgjidhej në bazë të votave të fituara në zgjedhje....Nëse opozita ka shumë liderë, dhe shumë parti, atëherë kthehet aty ku ka qenë - e shkapërderdhur, e defaktorizuar dhe jo imune ndaj interferimeve elektorale maqedonase....
Te maqedonasit është në rritje doza nacionaliste e elektoratit. Kjo u shpërfaq edhe në këto zgjedhje. Diferenca kaq e thellë në mes të Gordana Siljanovskës dhe Stevo Pendarovskit, ka prishë shumë punë. Ky hov nacionalist mund të parandalohet vetëm me shkaktimin e një krize politike-institucionale nga ana e LSDM, Frontit Europian, kolacionit VLEN,duke bojkotuar rrethin e dytë të zgjedhjeve presidenciale, në mënyrë që të dështojë censusi i nevojshëm i daljes në zgjedhje... Kjo i hap rrugë pastaj debatit politik për zgjedhjen e Presidentit në Parlament, ku shqiptarët do të kenë mundësi të faktorizohen politikisht, duke e orientuar votën sipas vullnetit dhe aspiratave që ata synojnë....
Sipas raportit të tanishëm të forcave, shqiptarët nuk mund ta parandalojnë triumfin e nacionalizmit maqedonas, por nuk mund ta ndihmojnë as Stevo Pendarovskin.
Opsioni i vetëm mbetet bojkotimi i zgjedhjeve, në mënyrë që ta pamundësojnë zgjedhjen e Gordana Siljanovskës për Presidente. Nëse marrin pjesë në zgjedhje (me afro 200 mijë vota), shqiptarët do ta rrisin censusin e daljes dhe kështu i ndihmojnë Silojanovskës të fitojë....(!)
Përvoja ka treguar se pas çdo refuzimi të idesë për konsensualitet brendashqiptar, na është imponuar një kandidat (partiak) maqedonas, të cilin tërthorazi apo drejtpërdrejt e kemi zgjedhur edhe me votat tona
Me një kryeministër (jo)teknik, (deri në zgjedhjen e Presidenti të ardhshëm në Parlament) dhe me një konsolidim dhe bashkërendim të dy opsioneve politke, shqiptarët kanë mundësi ta faktorizojnë fuqinë e ndikimit politik, duke marrë pjesë në pushtet jo si dekor, por si vendimarrës të njëmendët që do të avanconin statusin shtetfromues të shqiptarëve në Maqedoninë e Veriut.
Çdo rrugë tjetër, shqiptarët i shpie në zgjidhje koloniale të statusit të tyre.
Lini një Përgjigje