FLASH
Shkruar nga Arben Llangozi
A është ky fundi politik i Veliajt apo thjesht një episod i përkohshëm që do të pasohet nga një rikthim surprizë?
Dikur, kryeministri Edi Rama deklaroi publikisht se Erion Veliaj do të 'varej në një pemë', një shprehje që shumë e interpretuan si një sinjal të fortë për fundin e karrierës së tij politike.
Sot, ironia e fatit e ka sjellë Veliajn pas hekurave, dhe kjo me miratimin e vetë Ramës! Një rrugëtim që tregon qartë se në politikën shqiptare nuk ka miqësi të përjetshme, por vetëm interesa të përkohshme dhe lojëra të fshehta pushteti.
Prej vitesh, Erion Veliaj shihej si një nga besnikët më të mëdhenj të Ramës, një figurë që u ngrit fuqishëm në politikën shqiptare nën ombrellën e tij. Por sot, ai po përballet me të njëjtën fatkeqësi që kanë përjetuar shumë të tjerë para tij: nga një mbrojtës i regjimit, në një kokë turku për të larë hesapet politike.
Ky është një mësim i qartë se në politikë, sidomos në atë shqiptare, askush nuk është i përjetshëm. Ata që sot shfaqen si të paprekshëm, nesër mund të bëhen objekt goditjeje.
Në këtë skenar, shtrohet një pyetje thelbësore: A është ky fundi politik i Veliajt, apo thjesht një episod i përkohshëm që do të pasohet nga një rikthim surprizë?
A po e pastron Rama terrenin për të siguruar pushtetin e tij edhe për vitet që vijnë? Apo po përpiqet të mbajë larg vëmendjen nga problemet më të mëdha që rëndojnë mbi qeverisjen e tij?
Një gjë është e sigurt: shqiptarët po shohin, po analizojnë dhe po nxjerrin mësime. Historia ka treguar se politika është një arenë e pamëshirshme, ku aleatët e djeshëm mund të bëhen armiqtë e sotëm.
Loja politike vazhdon… por deri kur? Dhe kush do të jetë viktima e radhës?
Lini një Përgjigje