FLASH
Shkruar nga Pamfleti
Bashkimi Evropian përshpejton forcimin e euros dhe hedh në tryezë hipotezën e një “super euro” të mbështetur nga një treg unik i titujve evropianë.
Qëllimi i nismës është konsolidimi i rolit ndërkombëtar të monedhës së përbashkët, ulja e varësisë nga dollari dhe forcimi i autonomisë strategjike të Evropës në një kontekst gjeopolitik gjithnjë e më të paqëndrueshëm.
Në Bruksel u mblodh edhe formati i kufizuar i 6 ekonomive kryesore të BE-së, Franca, Gjermania, Italia, Spanja, Holanda dhe Polonia, të vendosura për t’i dhënë shtysë politike përfundimit të tregut unik. Ministrat e E6 synojnë ta shndërrojnë Evropën në një “port të sigurt” për kapitalet globale, duke shmangur shpërndarjen e vrullit aktual reformues.
Në qendër të analizës së Komisionit Evropian qëndron tregu i obligacioneve. Një dokument i brendshëm identifikon krijimin e një emetuesi unik për obligacionet supranacionale si levën për të kapërcyer fragmentimin aktual: bashkimi i emetimeve nën një subjekt të vetëm do të mundësonte ofrimin e titujve më të thellë dhe më likuidë, të aftë për të tërhequr investitorë ndërkombëtarë.
Euroja, thekson Brukseli, mund të bëhet një valutë e vërtetë globale vetëm nëse mbështetet nga një sistem financiar i integruar dhe nga një ofertë e gjerë aktivesh të denominuara në euro, shkruan monetaweb.
Titujt evropianë konsiderohen tashmë të sigurt dhe likuidë, por sipas Komisionit duhet zgjeruar shtrirja e tyre, duke rritur ofertën e instrumenteve të përbashkëta dhe duke lehtësuar aksesin në financim për ndërmarrjet në të gjithë Unionin, pa barriera kombëtare. Çështja u diskutua edhe në kuadër të Eurogrupit.
“Forcimi i rolit ndërkombëtar të euros nuk është një objektiv i ri, por konteksti gjeopolitik ka ndryshuar dhe imponon veprim”, ka vërejtur komisioneri për Ekonominë Valdis Dombrovskis.
Një euro më e fortë, ka shtuar ai, do të përbënte një shtyllë të strategjisë evropiane të reduktimit të rreziqeve, duke kontribuar në stabilitetin financiar, sigurinë ekonomike dhe uljen e kostove të financimit.
Gjithashtu do të ofronte mbrojtje më të madhe për importuesit dhe eksportuesit nga luhatjet e kursit të këmbimit.
Strategjia ndërthur ekonomi dhe siguri. Brukseli thekson se fragmentimi në rritje global dhe përdorimi gjithnjë e më i shpeshtë i sanksioneve financiare e bëjnë të nevojshme forcimin e autonomisë monetare evropiane. Në këtë kuadër përfshihet edhe zhvillimi i euros digjitale dhe promovimi i monedhës së përbashkët në kontratat ndërkombëtare, nga energjia te lëndët e para deri te transporti.
Në frontin e emetimeve të përbashkëta, në Kuadrin e ardhshëm Financiar Shumëvjeçar 2028–2034 po vlerësohet mundësia e përdorimit në mënyrë më të strukturuar të obligacioneve të garantuara nga buxheti i BE-së, sipas modelit të programit Safe, nëse do të lindë nevoja për të mbledhur kapitale të reja. /Përshtati Pamfleti/
Lini një Përgjigje