FLASH
Shkruar nga Pamfleti
Një hendek në rritje po evidentohet në sistemin bankar mes kursimtarëve me depozita të mëdha dhe atyre me kursime të vogla.
Teksa shuma e kursimeve në banka vijon të rritet nga viti në vit, të dhënat e Agjencisë së Sigurimit të Depozitave tregojnë se, gjatë vitit 2025, pjesa më e madhe e depozitave u mbajt nga një pakicë e kufizuar individësh. Nga rreth 13.1 miliardë euro depozita të individëve në banka, 5 për qind e depozituesve zotërojnë mbi 60 për qind të totalit.
Sipas të dhënave, 137.5 mijë individë kanë kursime mbi 2.5 milionë lekë. Edhe pse përbëjnë një pjesë të vogël të numrit total të depozituesve, vlera e depozitave të tyre arriti në 8.1 miliardë euro, raporton "TCH".
Deri në fund të vitit 2025, individët kishin të hapura 2.93 milionë llogari bankare të sigurueshme, ose 5 për qind më shumë krahasuar me një vit më parë. Në këto llogari ndodheshin gjithsej 1.39 trilionë lekë, me rritje vjetore prej 8.8 për qind, sipas Agjencisë së Sigurimit të Depozitave.
Megjithatë, krahas rritjes së numrit të llogarive dhe të shumës së kursimeve, raporti vjetor i vitit 2025 evidenton edhe shtimin e llogarive me balanca minimale ose zero. Agjencia bën të ditur se rreth një e treta e llogarive rezultojnë pa mjete.
Mbi 1 milion llogari kanë gjendje nga 0 deri në 100 lekë, nga rreth 2.92 milionë llogari të evidentuara në total. Kjo tablo tregon një përqendrim të lartë të kursimeve në një segment të kufizuar depozituesish.
Ky zhvillim sugjeron rritje të përqendrimit financiar në sistemin bankar. Megjithatë, vetëm të dhënat mbi depozitat nuk mjaftojnë, në vetvete, për të provuar nivelin e plotë të pabarazisë ekonomike në vend, pasi një vlerësim i tillë kërkon edhe tregues të tjerë, si të ardhurat, pasuria dhe konsumi.
Lini një Përgjigje