FLASH
Shkruar nga Pamfleti
Kupa e Botës 2026 po shkon drejt mbylljes, ndërsa mbetet vetëm finalja e madhe për të përcaktuar kampionin e ri të botës. Përveç lavdisë sportive dhe trofeut, kombëtaret pjesëmarrëse kanë garuar edhe për fondin rekord të shpërblimeve të vendosur nga FIFA.
Edicioni i këtij viti, i pari me 48 ekipe pjesëmarrëse, do të shpërndajë gjithsej 727 milionë dollarë në formë shpërblimesh, shifra më e lartë në historinë e Kupës së Botës.
Katër skuadrat më të mira të turneut do të ndajnë një pjesë të konsiderueshme të këtij fondi. Kampioni i botës do të përfitojë 50 milionë dollarë, ndërsa nënkampioni do të arkëtojë 33 milionë dollarë.
Edhe ndeshja për vendin e tretë ka peshë të madhe financiare. Fituesi i saj, Anglia, përfiton 29 milionë dollarë, ndërsa Franca, e renditur në vendin e katërt, merr 27 milionë dollarë. Përveç këtyre shumave, çdo ekip përfiton edhe 1.5 milionë dollarë për përgatitjet para turneut.
Edhe skuadrat e eliminuara në fazat e mëparshme nuk mbeten pa shpërblime. Ekipet që u eliminuan në çerekfinale marrin nga 19 milionë dollarë, ato që u larguan në raundin e 16-të përfitojnë 15 milionë dollarë, ekipet e eliminuara në raundin e 32-shëve marrin 11 milionë dollarë, ndërsa kombëtaret që u ndalën në fazën e grupeve arkëtojnë nga 9 milionë dollarë.
Sipas FIFA-s, shpërblimet financiare synojnë të mbështesin zhvillimin e futbollit në vendet pjesëmarrëse përmes investimeve të federatave kombëtare.
Shpërblimet sipas renditjes:
Kampioni i botës – 50 milionë dollarë
Nënkampioni – 33 milionë dollarë
Vendi i tretë – 29 milionë dollarë
Vendi i katërt – 27 milionë dollarë
Çerekfinalistët (vendet 5-8) – 19 milionë dollarë
Të eliminuarit në raundin e 16-të (vendet 9-16) – 15 milionë dollarë
Të eliminuarit në raundin e 32-shëve (vendet 17-32) – 11 milionë dollarë
Të eliminuarit në fazën e grupeve (vendet 33-48) – 9 milionë dollarë
Me vetëm një ndeshje të mbetur për t'u zhvilluar, finalja mes Spanjës dhe Argjentinës do të vendosë jo vetëm kampionin e ri të botës, por edhe fituesin e shpërblimit më të madh financiar që është dhënë ndonjëherë në historinë e Kupës së Botës.
Lini një Përgjigje