FLASH
Shkruar nga Pamfleti
Kristjan Asllani ndodhet aktualisht me Interin në Gjermani, ku skuadra zikaltër po zhvillon fazën përgatitore për sezonin e ri. Megjithatë, e ardhmja e mesfushorit shqiptar vazhdon të jetë e paqartë, pasi ai nuk bën pjesë në planet e trajnerit Kristian Kivu.
Në ditët e fundit ka qarkulluar një prapaskenë interesante në lidhje me situatën e Asllanit. Sipas zërave të merkatos, Interi synon ta shesë lojtarin përpara se ai të zhvillojë ndeshjen e tij të 100-të me fanellën zikaltër.
Asllani u transferua tek Interi në verën e vitit 2022 nga Empoli, fillimisht në formë huazimi me detyrim blerjeje. Pas përfundimit të sezonit të parë, klubi milanez pagoi rreth 15 milionë euro për kartonin e tij, ndërsa marrëveshja përfshinte edhe bonuse të lidhura me performancën.
Një nga këto bonuse, sipas raportimeve, parashikon që Interi t’i paguajë Empolit edhe 5 milionë euro shtesë në momentin që Asllani arrin kuotën e 100 paraqitjeve me skuadrën. Aktualisht, shqiptari numëron 99 ndeshje me fanellën zikaltër.
Nëse ky kusht kontraktual rezulton i vërtetë, atëherë aktivizimi i tij në ndeshjen e radhës zyrtare do ta detyronte Interin të derdhte bonusin prej 5 milionë eurosh. Kjo mund të shpjegojë edhe insistimin e klubit për ta larguar gjatë kësaj merkatoje, pa i dhënë mundësinë të regjistrojë paraqitjen e 100-të.
Deri më tani, i vetmi fakt i konfirmuar është se Asllani nuk bën pjesë në planet e trajnerit Kivu, ndërsa mbetet për t’u parë nëse mesfushori shqiptar do të gjejë një destinacion të ri për sezonin e ardhshëm.
Lini një Përgjigje