FLASH
Shkruar nga Pamfleti
Presidenti i Ukrainës, Volodymyr Zelensky, njoftoi se ka pranuar propozimin e Shteteve të Bashkuara për zhvillimin e një raundi të ri bisedimesh me qëllim përfundimin e luftës me Rusinë.
Në një intervistë për Bloomberg, cituar nga agjencia ukrainase Ukrinform, Zelensky deklaroi se takimi i ardhshëm pritet të mbahet të martën ose të mërkurën e javës së ardhshme. Ai theksoi se ende nuk dihet nëse Rusia do të pranojë të marrë pjesë në këto bisedime, të cilat pritet të zhvillohen në Shtetet e Bashkuara.
Në qendër të diskutimeve pritet të jetë një propozim amerikan për krijimin e një zone të lirë ekonomike që do të shërbente si zonë tampon në rajonin lindor të Donetskut. Megjithatë, Zelensky theksoi se si Kievi ashtu edhe Moska shprehin skepticizëm ndaj kësaj ideje.
“Asnjëra palë nuk është e interesuar për idenë e një zone të lirë ekonomike, as rusët, as ne. Kemi qëndrime të ndryshme për këtë. U dakorduam që të paraqesim një vizion se si mund të duket kjo në takimin e ardhshëm”, deklaroi ai në një intervistë telefonike nga Kievi.
Presidenti ukrainas theksoi se çështja e kontrollit mbi zonën tampon mbetet thelbësore dhe kërkon sqarim nga Shtetet e Bashkuara.
“Nëse është territori ynë, dhe është territori ynë, atëherë shteti të cilit i përket territori duhet ta administrojë atë”, u shpreh ai.
Zelensky shtoi gjithashtu se administrata e ish-presidentit Donald Trump kërkon nënshkrimin e menjëhershëm të dokumenteve, por theksoi se çdo marrëveshje paqeje duhet të miratohet në Ukrainë përmes një vote në parlament ose përmes një referendumi kombëtar.
Sa i përket raundit të fundit të bisedimeve, të mbajtur në Emiratet e Bashkuara Arabe, presidenti ukrainas tha se diskutimet u përqendruan te mekanizmat e armëpushimit dhe roli i SHBA-së në monitorimin e tyre. Sipas tij, negociatorët nuk arritën të finalizojnë detajet për shkak të mungesës së vendimeve politike në nivelin më të lartë.
Lini një Përgjigje