FLASH
Shkruar nga Pamfleti
Presidenti kinez Xi Jinping deklaroi se Kina dhe Shtetet e Bashkuara kanë hyrë në një fazë të re marrëdhëniesh strategjike, pas takimit me presidentin amerikan Donald Trump në Pekin.
Sipas Ministrisë së Jashtme të Kinës, të dy liderët ranë dakord të ndërtojnë një “marrëdhënie strategjike të qëndrueshme konstruktive”, që do të shërbejë si orientim për lidhjet dypalëshe në vitet e ardhshme.
Termi nuk është përdorur më parë në komunikimet zyrtare mes dy vendeve dhe shihet si përpjekje për të riformatuar raportet SHBA-Kinë pas viteve të tensioneve tregtare, përplasjes teknologjike dhe rivalitetit gjeopolitik.
Xi Jinping e përshkroi modelin e ri si një marrëdhënie ku bashkëpunimi mbetet elementi kryesor, ndërsa konkurrenca kontrollohet dhe dallimet menaxhohen pa përshkallëzim.
“Stabiliteti strategjik konstruktiv duhet të jetë një stabilitet pozitiv i karakterizuar nga bashkëpunimi, një stabilitet me konkurrencë të rregulluar dhe dallime të menaxhueshme”, deklaroi Xi.
Ai shtoi se kjo formulë “nuk duhet të mbetet slogan”, por të shoqërohet me veprime konkrete nga të dyja palët.
Deri tani, Shtëpia e Bardhë nuk ka publikuar një deklaratë të detajuar mbi terminologjinë e përdorur në takim, çka ka shtuar interesin diplomatik mbi formulën e re që promovon Pekini.
Takimi zhvillohet në një moment kur marrëdhëniet SHBA-Kinë mbeten të tensionuara për çështje si Tajvani, teknologjia, tregtia dhe influenca në Azi-Paqësor, ndërsa të dyja palët kërkojnë të shmangin një përplasje të drejtpërdrejtë ekonomike dhe ushtarake.
Lini një Përgjigje