FLASH
Shkruar nga Pamfleti
Autoritetet vietnameze kanë publikuar fotografitë e dy shtetasve australianë që dëshirojnë t’i marrin në pyetje pas vrasjes së një figure të njohur të botës së krimit në Sidnei.
Lorenzo Lemalu, 24 vjeç, i identifikuar si një prej drejtuesve të grupit kriminal “Coconut Cartel” dhe ish-bashkëpunëtor i familjes kriminale Alameddine, u qëllua për vdekje të enjten mbrëma jashtë një restoranti në Ho Chi Minh City.
Pamjet nga kamerat e sigurisë tregojnë momentet e fundit të Lemalu-së teksa qëndronte me disa persona në një zonë të mbushur me restorante, përpara se një person i armatosur dhe me kapuç ta qëllonte nga afër para klientëve të tronditur.
Nga sulmi mbeti i plagosur rëndë edhe Sam Sauni, 27 vjeç, një tjetër anëtar i lidhur me “Coconut Cartel”, me origjinë nga jugperëndimi i Sidneit. Mediat australiane raportojnë se ai ka mbijetuar, por gjendja e tij nuk dihet.
Policia vietnameze ka nisur hetimet dhe ka publikuar fotografitë e Lang Kenny Trong Minh Do, 36 vjeç, dhe Justin John White, 39 vjeç, të cilët dëshiron t’i intervistojë lidhur me ngjarjen.
Sipas autoriteteve, dy australianët janë larguar nga Ho Chi Minh City me taksi dhe më pas kanë zbritur pranë një supermarketi në Tay Ninh, qytet afër kufirit me Kamboxhian. Vendndodhja e tyre aktuale mbetet e panjohur.
Policia i ka cilësuar ata si “veçanërisht të rrezikshëm” dhe u ka bërë thirrje qytetarëve të mos i afrohen, por të raportojnë çdo informacion mbi lëvizjet e tyre. Autoritetet theksojnë se nuk ka akuza të ngritura ndaj tyre dhe se aktualisht kërkohen vetëm për t’u marrë në pyetje.
Pamjet e publikuara në rrjetet sociale tregojnë Lemalu-n të plagosur duke hyrë me vrap në një restorant aty pranë, ku më pas është rrëzuar. Ndërkohë klientët tentonin të largoheshin, një tjetër i plagosur shihet duke u zvarritur drejt trotuarit përpara se kalimtarët ta fusnin në ambientet e restorantit për ndihmë.
Një person tjetër shihet pranë trupit të përgjakur të Lemalu-së duke u përpjekur t’i japë ndihmën e parë, ndërsa stafi i restorantit kontaktonte shërbimet emergjente. Fotografitë e mëvonshme tregojnë ekipet mjekësore duke tentuar ta rikthenin në jetë.
Lemalu ishte më parë pjesë e grupit “Proper 60”, një bandë nga perëndimi i Sidneit e lidhur me familjen Alameddine dhe drejtuar nga Ali Younes, i njohur si “Ay Huncho”. Ai kishte tatuazhuar emrin e grupit në bark.
Sipas raportimeve, Lemalu ishte shkëputur nga rrjeti Alameddine pasi u largua nga Australia katër vite më parë dhe kishte nisur të drejtonte aktivitetet e “Coconut Cartel” nga Azia Juglindore.
“Coconut Cartel” konsiderohet një grup i ndarë nga rrjeti Alameddine dhe prej kohësh është përfshirë në konflikt për kontrollin e trafikut të drogës në Sidnei.
Fotografi të publikuara në rrjetet sociale muajt e fundit e tregonin Lemalu-n në Dubai dhe më pas në Shqipëri gjatë muajit të kaluar.
Mesazhe të siguruara nga platforma SCN Worldstar, të cilat pretendohet se janë dërguar nga persona të lidhur me rrjetin Alameddine, sugjerojnë se ata morën përgjegjësinë për ekzekutimin.
“Ja çfarë ndodh kur ‘Coconuts’ përpiqen të luftojnë njerëzit që i krijuan,” thuhej në një prej mesazheve.
Megjithatë, jo të gjithë besojnë se vrasja lidhet drejtpërdrejt me luftën e bandave në Sidnei. Sipas burimeve të botës kriminale të cituara nga “Daily Telegraph”, ekziston dyshimi se Lemalu mund të ketë pasur konflikte me grupe kriminale shqiptare.
Ngjarja ka shtuar frikën për përshkallëzim të mëtejshëm të përplasjeve mes bandave australiane.
Vetëm dy ditë më parë, Alai Ahio, 28 vjeç, ish-bashkëpunëtor i grupit australian të repit “OneFour”, u vra në një sulm të armatosur në jugperëndim të Sidneit.
Policia australiane deklaroi se Ahio ndodhej në një banesë në Canley Heights me katër persona të tjerë kur të paktën dy sulmues të armatosur me armë zjarri dhe thika hynë në pronë. Ai u transportua në spitalin e Liverpool-it, ku ndërroi jetë pak më vonë.
Katër persona të tjerë mbetën të plagosur, ndërsa autorët u larguan me një automjet tip SUV të bardhë dhe vazhdojnë të jenë në arrati.
Lini një Përgjigje