FLASH
Shkruar nga Pamfleti
Mesazhet e dërguara para sulmit hedhin dritë mbi motivet e mundshme politike të të dyshuarit
Një ditë pasi një person hapi zjarr gjatë darkës së Shoqatës së Korrespondentëve të Shtëpisë së Bardhë, autoritetet po analizojnë një mesazh të dërguar nga i dyshuari për të kuptuar se çfarë e çoi atë nga jeta si një mësues i respektuar në Kaliforni në një atentator të mundshëm.
“Më lejoni ta filloj duke kërkuar falje nga të gjithë ata, besimin e të cilëve e kam abuzuar,” thuhet në një shënim që autoritetet thonë se është dërguar nga i dyshuari, Cole Tomas Allen, 31 vjeç, nga Torrance, Kaliforni. Sipas të dhënave publike, ai punonte me kohë të pjesshme si mësues dhe njëkohësisht merrej me zhvillimin e video-lojërave.
Shënimi, që Allen dyshohet se ua dërgoi familjarëve para sulmit, përmbante deklarimin se ai synonte zyrtarë të administratës dhe shprehte zemërim politik, duke shtuar: “nuk pres falje”.
Sipas Shtëpisë së Bardhë, motra e tij u tha autoriteteve se Allen kishte një prirje për të bërë deklarata radikale ndërsa përfshihej gjithnjë e më shumë në aktivizëm të majtë në Los Anxhelos. Ajo shtoi se ai kishte blerë armë dhe kishte filluar të stërvitej rregullisht në një poligon qitjeje.
Në ditët e fundit, sipas autoriteteve, kjo retorikë u shndërrua në veprime konkrete. Allen hipi në një tren në Los Anxhelos dhe udhëtoi fillimisht drejt Çikagos dhe më pas në Uashington DC. Atje, ai u regjistrua në hotelin në qendër të qytetit ku po zhvillohej darka vjetore, një aktivitet ku merrnin pjesë Presidenti Donald Trump dhe zyrtarë të tjerë të lartë të administratës.
Autoritetet i thanë CNN se ai ishte i armatosur me një pistoletë gjysmë-automatike kalibër 38 dhe një armë gjahu kalibër 12. Para se të ndërmerrte veprimin, ai dyshohet se u dërgoi familjarëve një deklaratë të shkruar, ku e quante veten “vrasësi federal miqësor” dhe shprehte qëndrime kundër Trump-it.
Më pas, të shtunën në mbrëmje, ai tentoi të kalonte me forcë masat e sigurisë jashtë ambientit ku zhvillohej aktiviteti.
Sipas Prokurorit të Përgjithshëm në detyrë, Todd Blanche, i dyshuari “qëlloi disa herë” dhe goditi një agjent të Shërbimit Sekret, i cili mbante jelek antiplumb. Agjenti u plagos, por më pas mori trajtim mjekësor dhe u doli nga spitali. Ndërkohë, Allen u neutralizua dhe u arrestua menjëherë, ndërsa Presidenti Trump dhe liderë të tjerë u zhvendosën me shpejtësi në një sallë të afërt për siguri.
Autoritetet po analizojnë tani deklaratën e dërguar nga i dyshuari dhe aktivitetin e tij në rrjetet sociale, të cilin Trump e ka cilësuar si “anti-kristian”. Hetuesit po marrin në pyetje familjarët dhe po përpiqen të kuptojnë faktorët që mund ta kenë shtyrë drejt këtij sulmi.
“Ende po përpiqemi të kuptojmë motivin. Nga hetimet paraprake, duket se i dyshuari kishte në shënjestër anëtarë të administratës,” tha Blanche.
Shënimi përmban një sërë pakënaqësish të shprehura në mënyrë të përgjithshme, të cilat mund të ndihmojnë në përcaktimin e motivit. Mes tyre përfshihet zemërimi ndaj kushteve në kampet e ndalimit dhe një referencë ku Trump përshkruhet si “tradhtar”.
Sipas Prokurores Federale për Distriktin e Kolumbias, Jeanine Pirro, ndaj të dyshuarit janë ngritur dy akuza për përdorim arme zjarri dhe një akuzë për sulm ndaj një zyrtari federal me një armë të rrezikshme. Ajo nuk e bëri publik emrin e tij. Blanche shtoi se i dyshuari nuk po bashkëpunon me autoritetet.
Sipas profilit të tij në LinkedIn, Allen studioi në Institutin e Teknologjisë në Kaliforni (Caltech) nga viti 2013 deri në 2017. Gjatë studimeve, ai ishte pjesë e organizatës Christian Fellowship dhe e një klubi rekreativ të quajtur Nerf Club. Foto të publikuara në Facebook në vitin 2016 e tregojnë atë në aktivitete të kësaj organizate fetare.
Si student, ai u përmend në një reportazh lokal në vitin 2017 për zhvillimin e një prototipi të një sistemi frenimi emergjent për karrocat e invalidëve.
Ai u diplomua në vitin 2017 në inxhinieri mekanike. Më pas, gjeti punë si mësues me kohë të pjesshme në C2 Education, një kompani që ofron përgatitje për teste dhe tutorim. Sipas postimeve në rrjetet sociale të kompanisë, ai u shpall “mësuesi i muajit” në dhjetor 2024. Të shtunën në mbrëmje, askush nuk iu përgjigj telefonatave në numrin e kompanisë.
Allen deklaronte gjithashtu se punonte si zhvillues video-lojërash. Ai publikoi një lojë të pavarur të titulluar “Bohrdom” në platformën Steam, me çmim 1.99 dollarë. Sipas të dhënave federale, ai regjistroi markën tregtare të emrit të lojës në vitin 2018.
Loja përshkruhet në Steam si një “lojë luftarake asimetrike jo e dhunshme, e bazuar në aftësi, e frymëzuar lirshëm nga një model kimik që vetë është vetëm pjesërisht i bazuar në realitet”.
Në profilin e tij në LinkedIn, Allen shkruante se ishte duke zhvilluar një lojë të dytë me emrin e përkohshëm “First Law”.
Në vitet e fundit, ai ishte përfshirë në aktivizëm politik. Sipas motrës së tij, ai iu bashkua një grupi të majtë të quajtur “The Wide Awakes”, një emër që i referohet protestuesve kundër skllavërisë në vitet 1860 që mbështetën zgjedhjen e Abraham Lincoln si president.
Sipas të dhënave të Komisionit Federal të Zgjedhjeve, Allen kishte dhuruar 25 dollarë për fushatën presidenciale të Kamala Harris në tetor 2024.
Hetuesit nga Byroja e Alkoolit, Duhanit, Armëve të Zjarrit dhe Eksplozivëve (ATF) zbuluan se Allen kishte blerë armët në mënyrë të ligjshme. Më 6 tetor 2023 ai kishte blerë një pistoletë kalibër .38 në një dyqan në Kaliforninë Jugore, ndërsa më 17 gusht 2025 kishte blerë një armë gjahu kalibër 12 në qytetin e tij të lindjes, Torrance.
Në të dy rastet, blerjet kërkonin verifikim përmes FBI-së për të konfirmuar se ai nuk ishte në kërkim, nuk ishte subjekt i ndonjë urdhri ndalimi dhe nuk kishte precedent penal.
Pas udhëtimit me tren nga Los Anxhelos drejt Uashingtonit, ai u regjistrua në hotelin Washington Hilton, i cili tradicionalisht pret këtë aktivitet vjetor.
Të shtunën në mbrëmje, sipas Shtëpisë së Bardhë, ai u dërgoi familjarëve një mesazh ku “deklaronte qartë se donte të shënjestronte zyrtarë të administratës”.
Në këtë mesazh, ai kërkonte falje ndaj prindërve, kolegëve dhe nxënësve të tij, dhe theksonte se nuk kishte për qëllim të synonte në mënyrë specifike forcat e rendit. Megjithatë, ai shtonte: “Do të kaloja mbi shumicën e njerëzve këtu për të arritur objektivat, nëse do të ishte absolutisht e nevojshme.”
Ai argumentonte gjithashtu se veprimi i tij nuk binte ndesh me vlerat e krishtera, duke shkruar: “Të kthesh faqen tjetër kur shtypet dikush tjetër nuk është sjellje e krishterë; është bashkëpunim në krimet e shtypësit.”
Mesazhi përfundonte me një shprehje të fortë zemërimi: “Ndjej zemërim duke menduar për gjithçka që kjo administratë ka bërë.”
Pas marrjes së këtij mesazhi, vëllai i tij kontaktoi Departamentin e Policisë në New London, Connecticut, për të shprehur shqetësimin. Edhe anëtarë të tjerë të familjes kontaktuan autoritetet.
Brenda hotelit, i dyshuari arriti të kalojë një pikë kontrolli sigurie jashtë sallës së aktivitetit. Agjenti i Shërbimit Sekret i plagosur u trajtua dhe u lirua nga spitali, sipas autoriteteve.
Pas ngjarjes, forcat e rendit nisën të rindërtojnë lëvizjet dhe motivet e mundshme të Allen. Agjentë të Shërbimit Sekret dhe policia e qarkut Montgomery intervistuan motrën e tij në Rockville, ndërsa agjentë të FBI-së u vendosën jashtë një shtëpie të lidhur me të në Torrance, një periferi e Los Anxhelosit.
Zona u rrethua me shirit policie dhe banesa u ndriçua me projektorë. Në vendngjarje u mblodhën gazetarë të shumtë dhe mbi zonë fluturonin helikopterë mediatikë.
Një fqinj, që nuk pranoi të identifikohej, i tha CNN se nuk ishte i sigurt nëse Allen jetonte në atë pronë. Ai tha se nuk e shihte shpesh, por kishte qenë aty “disa ditë më parë”. Sipas tij, babai i të dyshuarit ishte një person i sjellshëm dhe komunikues, me të cilin fliste shpesh. /Përshtati Pamfleti/
Lini një Përgjigje